Жаңарған Жамансор

Атырау өңіріндегі Жамансор – облыс орталығынан ең шалғайдағы Қызылқоға ауданы аумағындағы шағын станция. Станцияға күніне 20 шақты пойыз келіп кетеді. Оның ішінде жүк және жолау шы пойыздарымен қатар, мұнайшыларды тасымалдайтын қала маңы тасымалы пойызы да қатынайды. Станция бастығы Дарын Есенов жас кадрлар қатарынан.

– Жамансор – 4-ші класты, үш жолы бар станция. Мұнда тәулігіне жиырмадан астам жүк және жолаушы пойыздары келеді. Бұрын одан да көп болатын, пойыздардың бірі келіп, бірі кетіп жатқан қарбалас шақтар еді. Қазір ондай жүктеме жоқ. Станция басында вокзал, электрмен, байланыспен жабдықтау, жол дистанциясы, вагон шаруашылығы бөлімшелері бар. Атырау-Алматы, Атырау-Астана бағытына жүретін жүрдек пойыздар шыққалы жұмысымыз біраз күрделенді, жауапкершілік артты. «Тальго» пойыздары қатты жылдамдықпен жүретіндіктен байланыс, электр құралдарының дұрыс жұмыс жасауына, қауіпсіздікке баса мән беріледі. Жалпы станция қалыпты жұмыс жасап тұр, отырған жеріміз жылы, алаңсыз жұмыс жасауға жағдай бар. Жүк тасымалына келсек, өткен 8 айда 731 вагон жүк түсіріліп, 94 вагон жүк тиелді, – дейді ол.  

Станцияға күрделі жөндеу жүргізілгелі ғимарат іші де, сырты да жарқырап тұр. Кезекшінің бөлмесі бөлек, станция бастығының, аға электромеханиктің өз бөл мелері бар. СОБ қондырғылары қорабы бір бөлмеде орналасқан. Бұрын байланыс құралдары ашық-шашық тұратын болса, енді олардың бәрін арнайы қорапқа орналастырып, монтаждалып, барлық байланыс түрлері жаңаша орнатылды. Бұл – қандай да ақау бола қалса, соны дәл табу үшін және ақауды уақытылы орнынан келтіру үшін аса қажет шаруа. Қозғалыс қауіпсіздігі, бағдаршам, бұрмалардың дұрыс жұмыс жасауына зор мән беріледі. Станция қызметкерлерінің бәрі де сол Жамансор ауылының байырғы тұрғындары. Бұлар үшін болат жолдағы жұмыс сүйікті мамандығы болумен қатар, тіршілік ету өзегі деуге де болады. Жамансор станциясында барлығы 8 бағдаршам, 6 автоматты түрде жұмыс істейтін бағыттамалы бұрма бар. Бәрі де қалыпты жұмыс жасап тұр.