Мұнай жолына қызмет көрсететін станция

Қазіргі уақытта 4-класты станцияға жататын Мұқырдың тарихы соғыс жылдарымен тұспа-тұс келеді. Мұнай тасымалына жедел жол тартуды мақсат тұтқан кеңес үкіметінің жобасы нәтижесінде салынған Гурьев – Қандыағаш телімі бойында жатқан Мұқыр станциясы, міне, сексен жылдан бері өлке тасымалына қызмет етіп келеді.

Соңғы жылдары күрежолдың үстінде жатқан бұйығы станция қайта түлей бастады.  темір жолдар жаңартылып, инфрақұрылым жаңғыруда. Станция бастығы, жас кадр Абылай Жолдастың айтуынша, станциялық негізгі жолдардың ағаш шпалы түгел темірбетонға ауыстырылған. Биыл Атырау – Сағыз учаскесі бойынша 13,67 км,  рзд.279 – Мұқыр, Кенбай – Жамансор, Қоркөл – Рзд-464 аралығында 31,05 км жол салу мен күрделі жөндеу жұмыстары жүргізілген. Станцияда негізгі жол үшеу және 4 кірме жол бар. Ағымдағы жөндеу нәтижесінде пойыз жүрудің станциялық жылдамдығы 100-120 сағат/шақырым құраған. Ал Тальго жүрдек пойызы сағатына 130 жылдамдықпен жүреді. Станцияда 40 адам жұмыс істейді, оның ішінде байланыс, электрмен қамту, вагоншылар, т.б. жұмысшылар бар. Олардың бәрі бір мақсатқа – станция арқылы өтетін жолаушы және жүк пойыздарының қозғалыс қауіпсіздігін қамтамасыз етуге жұмылған.  

Вокзал 150 орынға шақталған, ішінде вокзал қызметкерлерімен қатар станция бастығы мен станция кезекшісі де отырады. «Жолаушылар тасымалы» АҚ-на қарасты электронды билет кассасы жұмыс істейді. Вокзалға 2014 жылы күрделі жөндеу жүргізіліп, қызметкерлердің жұмыс істеуіне қолайлы жағдайдың бәрі жасалған. Станция арқылы тәулігіне 6 жұп жолаушылар пойызы, Тальго жүрдек пойызы және 20 жұп жүк пойызы өтеді. Солардың бәрін қабылдау, өткізуде соңғы жылдары дендеп ене бастаған сандық технологияның көмегі аз емес. Бүгінде заманға сай барлық құралдар электрлендірілген және цифрлық басқаруға көшуде. Мәселен, КТСМ қондырғысы жүріп келе жатқан пойыз доңғалақтарының ақауын тез тауып, көрсетеді. Бәрі компьютерде тайға таңба басқандай көрініп тұрады. Станция АЛСН қондырғысымен де жабдықталған. Сол секілді бағдаршам, бұрмалар, басқа да құралдар жұмысы, оларды уақытылы жөндеу де үнемі байланысшылар назарында.  

Жалпы, Мұқырда бүгінде 5 мыңның үстінде тұрғын бар. Бұрын жолаушылар пойызы үш-ақ минут аялдайтын. Кейін жергілікті тұрғындардың өтініші ескеріліп, пойыздың станцияда тұру уақыты 3 минуттан 5 минутқа ұзартылған. Атырау – Ақтөбе бағытындағы пойызға демалыс және мейрам күндері жалпы вагон қосу, Атыраудан Сағызға дейін аймақішілік жаңа рейс шығару мәселесі де жиі көтеріліп келеді. Атырау – Мұқыр аралығына айына екі рет мұнайшылар үшін вахталық пойыз да жүреді. Ауылдық жер болғасын жергілікті халықта мал басы баршылық.  Соған орай пойыздың мал басуын болдырмас үшін станция жолдарының жиегіне қоршау салынған. Жол шаруашылығы қызметкерлері күшімен биылғы жылы 149,2 шақырым қоршау тұрғызылуы жоспарланып, көптеген учаскелерде, соның ішінде Мұқыр станциясында да қоршау салынды. Өткен тоғыз айда станцияда жазатайым оқиға не жарақат алу, қауіпсіздік ережесін бұзу жағдайы тіркелмеген.