Теңдік станциясы толық қуатта: тәулігіне жүздеген вагон өңделуде
Атырау облысы бойынша меншікті тілші
Аймақта жүк тасымалына айтарлықтай үлес қосып отырған Атырау мұнай өңдеу зауытының Промышленная станциясы Теңдік станциясымен қоян-қолтық жұмыс жасайды.
Бөлек жоба бойынша салынған зауыт ішіндегі Промышленная станциясында 11 жол бар. Вагондар сонда сұрыпталады. Пойыз бұрынғыдай Ақжайық станциясына соқпай, Теңдіктен зауыттың сұрыптау станциясына тікелей келеді де, әрі қарай зауытқа жол тартады. Зауыт станциясы Теңдікке толық құрамды пойыз дайындап береді, ал соңғысы оларды жан-жаққа таратады.
Қайта жаңғыртудан өткен Теңдік станциясына жүктің көбі Мақаттан келеді. Теңдік пен Мақат станциясының аралық телімі 118 шақырымды құрайды. Олардың аралығында Қарабатан, Ескене, Доссор станциялары мен разъездер бар. Мақат әр тарапқа жол тарайтын тораптық станция болғандықтан, одан жан-жақтан келген жүк және жолушы пойыздары тарайды. Теңдік станциясы бастығының орынбасары Ізбасар Өткелбаевтың айтуынша, станция толық қуатымен жұмыс жасап келеді. Бүгінде станцияда тәулігіне 200-ге жуық вагон тиеліп, 30-40 вагон жүк түсіріледі.
– Бүгінде Теңдік станциясы толық қуатымен жұмыс істеуде. Станцияның пойыздарды өткізу қабілеті бұрынғыдан бірнеше есеге артқан. Станция басында бұрынғы 2 жолға қосымша жаңа 2, 4, 6-шы 3 қабылдап-жөнелту және 1 құрастыру жолы салынған. Олардың жалпы ұзындығы 5690 метрді құрайды. Станцияда соңғы технология бойынша жабдықталған «МПЦ-И» орталықтандырылған басқару пульті орналасқан жаңа ғимарат бар. Ол станция бастығы, кезекші, оператор, вагон қараушылар, байланысшы, жолшылар, электр энергиясымен қамту, кеден, басқа да қызметкерлер үшін арнайы бөлмелермен жабдықталған. Жолшыларға арналған жылынатын бөлме де бар. Бүгінгі таңда магистральды қатынасты есептемегенде, Атырау мұнай өңдеу зауытына тәулігіне 20 шақты жұп пойыз қабылдап-жөнелтіледі, – дейді Ізбасар Өткелбаев.
2025 жылы станцияда қозғалыс қауіпсіздігі және еңбек қорғау бойынша тәртіп бұзушылық болмаған. 12 айдың қорытындысы бойынша барлығы 13552 вагон түсіріліп, кіріс 659 140 094 теңгені құраған. Станциядан тиеліп жөнелтілген жүк көлемі 84 922 вагон, 4 755 637 тонна болған. Вагонның бір жүк операциясына тұру көрсеткіші, вагондар жұмыс паркін ұстау, статиститикалық салмақ толық көлемде орындалған.