Мұнай өңдеу өндірісінің қарқын алуы «Қарабатан» станциясындағы жүк тасымалын еселеді

Атырау ЖТ бөлімшесі өнеркәсіптік базасы дамыған, аса күрделі магистральды бағытта орналасқан. Әрі бөлімше жұмыс көлемі ауқымды транзиттік аймақ қатарына жатады. Соған сәйкес, өңірдегі станциялардың өткізу қабілетін арттыру – өзекті мәселенің бірі. Бөлімшеге қарасты қырықтан астам өтпелі шағын станцияның бірі – үшінші класты Қарабатан станциясы. Бұл бұрын бес-ақ адам жұмыс жасаған шағын ғана разъезд болатын. Сол маңда «Болашақ» зауыты ашылатын болған соң, яғни «Қашаған» кен орнынан келген мұнай өңдеу зауытының салынуына байланысты 2005 жылы станция ғимараты жаңадан салынып, теміржолшылар игілігіне ұсынылды. Сол кезден бастап Қарабатанның бағы жанды деуге болады. «Болашақ» зауыты «Қашаған» теңіз кенішінде өндірілетін және құбыр жүйесімен қондырғыға жеткізілетін тауарлы мұнай мен газды әзірлеуге есептелген. Зауыт қуаты тәулігіне 450 мың баррель немесе жылына 22,5 миллион тоннаны құрайды. Мұнда мұнайды судан айыру және тұрақтандыру, меркаптаннан тазарту, тәжірибелік-өндірістік өңдеу кезінде сақтау және экспорттау жұмыстары жүргізіледі. Қуаты жылына 6,2 миллиард текше метр газ өңдеу жүйесі мұнайды күкірттен айыру, сығымдалған газды тауарлы деңгейге дейін даярлау жұмыстарына есептелген. Мұнда сонымен қатар тауарлы күкірт те өндіріледі. Зауыт құрылысы басталған сәттен бастап Қарабатан станциясының атқарар жүгі лезде артып кетті. Ең алдымен зауыт құрылысына қажетті материалдың бәрі пойыз арқылы тасымалданып, станцияға жеткізілген болатын. Одан әрі зауыт өнімдерін тасымалдау басталып кетті. Станцияда қазіргі уақытта 11 жол торабы бар және «Болашақтағы» 2 зауыттың әрқайсысына тармақ жолдар тартылған. Қашаған кен орны жұмысына байланысты Қарабатан станциясынан 60 жартылай вагондар мен 40 футтық контейнерлер экспортқа жіберіледі. «Болашақ» зауытында шығарылатын түйіршіктелген күкірт өнімінің көбеюіне байланысты, 2018 жылдың 2-ші жартыжылдығынан бастап станция арқылы ай сайын Лужская бекетіне 60 жартылай ашық вагон құрайтын 28 маршрут тиеледі. Жүк жөнелтушілер «Тенгизская Транспортная Компания» ЖШС, «Исткомтранс» ЖШС, т.б. Бүгінде Қарабатан арқылы өтетін жүк пойыздары бұрынғыдан да көбейген. Соған орай станция әлеуеті де артқан.