Батыс өңірдегі пойыз қозғалысын басқару орталығы «Қасіретті қаңтар» сынында сыр бермеді
Ақтөбе облысы бойынша меншікті тілші
Ұлттық компания үшін Батыс Қазақстан теміржолының орны ерекше. Тоғыз жолдың торабында орналасқан Ақтөбе өңірінің ел экономикасы үшін маңызы жоғары. Қазақстан темір жолының бірегей жобасы «Пойыздар қозғалысын басқару» орталығының да Ақтөбеде ашылуының өзіндік себебі жоқ емес.
«ҚТЖ-Жүк тасымалы» ЖШС Батыс филиалының басшысы Бөріхан Беркімбаевтың айтуынша, бұл әсіресе кешегі «қаңтар оқиғасы» орын алған төтенше жағдай кезінде жоғары тиімділігін байқатқан. Сол күндері батыс өңірінде 5 жолаушылар пойызының қозғалысы шектеліп, Қандыағаш, Сексеуіл, Қазалы станцияларында тұрып қалғаны белгілі. Бес бірдей бөлімшенің – Ақтөбе, Атырау, Маңғыстау, Орал, Қызылорда диспетчерлік орталықтарын біріктірген Пойыздар қозғалысын басқару орталығының мүмкіндігінің нәтижесінде осы аймақтардағы бүкіл қозғалысты бақылауда ұстау, дер кезінде қажетті шараларды қабылдау жүзеге асырылған. Яғни, өңірдегі бүкіл теміржол қозғалысы, жүк және жолаушы пойыздарының дерегі, қай станцияда аялдап тұр, оларды қай жолмен қайда жіберу, кері қайтару немесе сапарын жалғастыру мүмкіндігі орталық мамандарының сауатты шешім қабылдап басқаруы арқасында артық шығынсыз жүзеге асқан. Айта кетейік, аймақта төтенше жағдай кезінде «Пойыздар қозғалысын ұйымдастыру орталығында» пойыздардың тоқтаусыз қозғалысын ұйымдастыруға құрылған арнайы штаб жұмыс істеді.
Өткен жылы аймақ көрсеткіші де жоғары нәтижелерге жеткен. Атап айтсақ, Батыс аймақтық филиалында жүк айналымы бойынша көрсеткіш 2021 жылы 105,4% деңгейге жеткен. Жоспар 21 291 млн тонна км болса, орындалғаны – 22 445,9 млн тонна км. Ал статикалық жүктеме 100,5% деңгейге жеткен. Бұл жерде жоспар 64,58 т/вагон болса, нақты орындалғаны– 64,90 т/вагон.
Бүгінде бөлімшеде 2022 жылға арналған мақсаттар мен міндеттердің орындалуын басшылыққа алған жұмыстар жалғасып жатыр. «Үш негізгі мақсат – тәртіп, табыстылық және оң бедел қағидасын ұстана отырып, ағымдағы жылы тасымалдау қызметінің тиімділігі бойынша жобаларды жүзеге асыруды жолға қоямыз», – дейді сеніммен бөлімше бастығы Бөріхан Беркімбаев.