ҚХР-дан Ауғанстанға шыққан пойыз Қазақстан арқылы барады
“KTZ Express” АҚ (“ҚТЖ” ҰК” АҚ еншілес компаниясы) China Railway Container Transport Co., Ltd. (CRCT) - Қытайдағы контейнерлік теміржол тасымалдарының жетекші операторымен ынтымақтаса Қытай Халық Республикасы мен Ауғанстан Ислам Республикасы арасында жүк тасымалы үшін жаңа теміржол маршруты ұйымдастырылды, деп хабарлайды Rail-news.kz.
Маршрут ҚХР, Қазақстан, Өзбекстан және Ауғанстан арқылы өтеді. Жүк құрамдары Қытай шекарасын Қорғас бақылау-өткізу пункті арқылы кесіп өтіп, Қазақстан Республикасының аумағы (Алтынкөл станциясы) арқылы, содан кейін Өзбекстан Республикасы (Галаба станциясы) арқылы өтіп, соңғы межелі пунктке – Хайратон қаласына (Ауғанстан) шамамен 12-15 күнде жетеді.
Осы бағыт бойынша алғашқы пойыз Туаньцзецунь станциясынан (Чунцин қаласы, ҚХР) жолға шықты. Құрамына телекоммуникациялық жабдықтары бар 55 контейнер кіреді.
Бұл бағыттың ашылуы Қазақстанның стратегиялық транзиттік хаб ретіндегі басты рөлін нығайтады.