Қазақстандық PTC holding компаниясы Грузияда терминал ашпақ
Қазақстандық PTC holding компаниясы қажетті рұқсаттарды алып, 2025 жылғы 9 маусымда Грузияның Поти портында 9 гектар аумақта орналасқан өз терминалын ашуға дайындалып жатыр, деп хабарлайды Rail-news.kz.
Бұл терминал Орта дәліз құрылымындағы маңызды нысандардың бірі болмақ. Орта дәліз – Транскаспий халықаралық көлік бағдарының (ТХКБ) құрамдас бөлігі. 2025 жылы осы дәліз арқылы Қытай мен Еуропа арасында транзитпен 95 мың TEU-ге дейін жүк тасымалдау жоспарланып отыр.
Контейнерлік алаңда сағатына 50 TEU-ге дейін жүк ауыстырып тиеуге мүмкіндік бар. Ол екі заманауи кранмен және басқа да тиеу-түсіру техникасымен жабдықталған. Терминал халықаралық стандарттарға сай: өрт сөндірудің гидранттық жүйесімен, жарықтандыру, сумен жабдықтау және кәріз жүйелерімен қамтылған. Теміржол инфрақұрылымы бір уақытта 120 вагонды қабылдап, өңдеуге мүмкіндік береді. Терминалдың жылдық өңдеу қуаты – 200 мың TEU-ге дейін. Клиенттерге басқа көлік түрлерімен жеткізілген жүктерді контейнерге тиеп, теңіз арқылы тасымалдау қызметі ұсынылады. Қазіргі таңда 50 адам жұмыс істейтін терминалда 2025 жылдың соңына дейін қызметкерлер саны 120-ға дейін ұлғайтылады. Жұмыс күші негізінен жергілікті тұрғындар есебінен тартылмақ.
31,5 млн АҚШ доллары көлеміндегі жобаны қаржыландыру Қазақстан Халық банкінің Грузиядағы еншілес құрылымы арқылы жеке инвестициялар есебінен жүзеге асқан. Терминал құрылысы 2023 жылдың тамызында басталған болатын.