Қытайда панда бейнесіндегі монорельс пойызы таныстырылды
Чунцин қаласында Қытайдың символына айналған алып панданың бейнесімен безендірілген сегіз вагоннан тұратын заманауи монорельс пойызы таныстырылды. Бұл инновациялық жоба CRRC компаниясына тиесілі, деп хабарлайды Rail-news.kz.
Пойызды осы жылдың екінші жартысында іске қосу жоспарланып отыр. Бұл қалаішілік көлік жүйесінің дамуындағы жаңа кезең болмақ.
Инженерлер пойыз ішін 92 орындықпен жабдықтаған, олардың әрқайсысы 180 градусқа айнала алады – бұл жолаушыларға барынша жайлылық сыйлайды. Әр вагон 200-ден астам адамды сыйдыра алады. Сонымен қатар, пойызда жарық пен ауа баптау жүйелері автоматты түрде жұмыс істейтін энергия үнемдеуші технологиялар қолданылған.
Монорельс көлігінде алғаш рет терезелер фотохромды әйнектен жасалған – олар ультракүлгін сәулелердің 99 пайызын бөгейді. Бұдан бөлек, терезелерге сенсорлық экран мен күңгірттендіру функциясы орнатылған.
Пойыздың сыртқы корпусының көптеген бөлшектері көміртекті талшықтан жасалған, бұл оның салмағын жеңілдетіп, беріктігін арттырады. Мұндай тәсіл энергияны үнемдеуге және техникалық тозуды азайтуға көмектеседі.
CRRC компаниясының панда стиліндегі бұл монорельс пойызы жаңа платформаның негізінде жасалған. Ол әртүрлі монорельс бағыттарына бейімделе алады. Пойызда тұрақты магнитті тартқыш электр қозғалтқыштары мен жоғары жиілікті инверторлар орнатылған. Сондай-ақ, құрамда техникалық компоненттердің жағдайын алдын ала анықтайтын диагностикалық жүйе бар, бұл қызмет көрсету шығындарын 30 пайызға дейін азайтуға мүмкіндік береді.
Осылайша, панда бейнесіндегі CRRC монорельс пойызы – технология мен экологияны, сондай-ақ ұлттық мәдени ерекшеліктерді біріктіретін бірегей көлік түрі. Компания Қытайдың ірі қалаларындағы қоғамдық көліктің келбетін өзгертетін интеллектуалды әрі көз тартарлық шешімдерге басымдық беруде.