Talgo компаниясы Өзбекстанның жүрдек пойыздарына техникалық қызмет көрсетеді

Испанияның Talgo компаниясы мен «Өзбекстан темір жолдары» («Узбекистон темир йуллари») маңызды келісімге қол қойды. Келісімшарт аясында испандық мамандар алдағы 10 жыл бойы Өзбекстанның алты бірдей Talgo 250 жүрдек пойызына кешенді техникалық қызмет көрсететін болады. Құны шамамен 80 млн еуроны құрайтын бұл жоба — компанияның аталған елдегі ең ірі келісімшарты, деп хабарлайды Rail-news.kz.

Өзбекстанда Afrosiyob деген атпен танымал Talgo 250 пойыздары бүгінде сағатына 230 шақырым жылдамдықпен қатынайды. Айта кетейік, бұл техниканың конструкциялық мүмкіндігі сағатына 275 шақырымға дейін жетеді.

Өзбекстанның жүрдек пойыздар паркі біртіндеп қалыптасты:

• 2009–2011 жылдар: Тоғыз вагоны бар алғашқы екі пойыз сатып алынып, қолданысқа берілді.
• 2017 жыл: Екінші келісімшарт аясында паркті тағы екі бірдей 11 вагонды пойыз толықтырды.
• 2019–2021 жылдар: Тағы екі пойыз сатып алынып, алғашқы құрамдарды кеңейту үшін қосымша төрт вагон әкелінді. Нәтижесінде барлық пойыздар 11 вагонды форматқа көшірілді.

Жүрдек пойыздар паркін одан ары ұлғайту мақсатында «Өзбекстан темір жолдары» 2024 жылдың маусым айында оңтүстік кореялық Hyundai Rotem компаниясымен жаңа келісімшарт жасасты. Бұл құжат сағатына 250 шақырым жылдамдықпен жүретін жеті вагонды алты жаңа пойызды жеткізу мен оларға қызмет көрсетуді көздейді.

Инфрақұрылымды дамыту жұмыстары да қарқынды жүруде. Мәселен, 2025 жылдың желтоқсанында Өзбекстанда Hyundai Rotem электропойыздарына қызмет көрсететін жаңа депо ашылды. Бұл нысан 2018 жылдан бері Talgo 250 пойыздарына сервис ұсынып келе жатқан ірі техникалық орталықтың құрамына кірді.