Talgo Сауд Арабиясы үшін тағы 20 жүрдек пойыз жасайды
Talgo компаниясы Сауд Арабиясының SAR мемлекеттік теміржол компаниясы үшін 20 жүрдек электр пойызын жеткізуге 1,3 млрд еуро көлемінде келісімшарт жасасты. Осы келісімді есепке алғанда, Talgo-ның жалпы тапсырыс қоржыны шамамен 6 млрд еуроны құрамақ, деп хабарлайды Rail-news.kz.
Келісімшартта жаңа пойыздарды да, бұрын жеткізілгендерді де 2033 жылға дейін техникалық қызметпен қамтамасыз ету қарастырылған, сондай-ақ бұл қызметтерді 2038 жылға дейін ұзарту мүмкіндігі бар.
Мекке, Жидда және Медина қалаларын байланыстыратын Haramain жоғары жылдамдықты теміржол желісінің 2018 жылғы ашылуына орай, компания SAR үшін шөлді аймақтың күрделі жағдайларында жұмыс істеуге арналған 35 пойыз салған болатын. Қазіргі уақытта олар күн сайын 100-ден астам рейс, ал қажылық кезеңінде 140-тан астам рейс жасайды. 2025 жылы қажылық кезінде бұл пойыздармен 2 миллионға жуық жолаушы тасымалданды.
Сағатына 300 шақырым жылдамдыққа ие жаңа пойыздар бұрынғы жеткізілген пойыздармен бірдей сипаттамаға ие болады. Олардың әрқайсысы екі моторлы және 13 тіркемелі жолаушылар вагонынан тұрады. Пойызда барлығы 417 отыратын орын бар. Вагондарда мүмкіндігі шектеулі жандар үшін жағдай жасалып, буфет қарастырылған.
Ұзындығы 450 шақырымнан асатын Haramain желісі Испанияның жоғары жылдамдықты теміржол желісі стандарттары бойынша салынған және пайдаланылуда. Ол пойыздар қозғалысын басқарудың еуропалық ETCS (2-деңгейлі) жүйесімен жабдықталған. Talgo Сауд Арабиясында пойыздарға техникалық қызмет көрсету және жөндеу бойынша екі кәсіпорынды басқарады, онда 270-тен астам адам еңбек етеді.