Лондон мен Швейцария арасында тікелей пойыз қатынайтын болады
Швейцарияның федералды теміржолы (SBB), SNCF Voyageurs және Eurostar операторлары Лондон мен Швейцария қалалары арасында Ла-Манш бұғазы астындағы тоннель арқылы тікелей пойыздарды іске қосу туралы ынтымақтастық келісіміне қол қойды, деп хабарлайды Rail-news.kz.
Бұл келісім Швейцария мен Лондон арасындағы ықтимал тікелей бағытты жоспарлау бойынша тараптардың ынтымақтастығын қамтиды. Жобаны іске қосу үшін шекаралық бақылауға қатысты ұйымдастыру мәселелерін шешу, инфрақұрылымды дайындау, үкіметаралық келісімдерге қол қою, тиісті жылжымалы құрам мен қозғалыс кестесін алу қажет. Жоба 2030 жылдардан ерте іске асырылмайды деп күтілуде.
Алдын ала жүргізілген зерттеулер Лондонға дейінгі тікелей пойыздардың жол жүру уақыты Базельден 5 сағатты, Женевадан 5,5 сағатты және Цюрихтен 6 сағатты құрайтынын көрсетті. Мұндай бағыттар нарықта үлкен сұранысқа ие болып, жолаушылардың күткенінен шығады деп болжануда. Қазіргі уақытта Швейцарияда Лондонға бағытталған әуе рейстері ең танымал бағыттардың қатарына кіреді.
Бұл келісімге қол қоюға SBB мен Францияның ұлттық теміржол қоғамының құрамындағы жолаушылар тасымалдаушысы SNCF Voyageurs арасындағы ынтымақтастық шартының ұзартылуы негіз болды. Ынтымақтастықтың басты мақсаттарының бірі - Швейцария мен Франция арасындағы немесе Франция аумағы арқылы өтетін трансшекаралық маршруттар желісін дамыту. SNCF Voyageurs Ла-Манш тоннелі арқылы тасымалдауды жүзеге асыратын Eurostar операторының негізгі акционері болып табылады.