Өзбекстанда Қытайдың CRRC компаниясы шығарған алғашқы push-pull пойызы пайдалануға берілді
Өзбекстанда Қытайдың CRRC компаниясы шығарған алғашқы push-pull пойызы жолаушылар тасымалына шығарылды, деп хабарлайды Rail-news.kz.
CR200J моделіндегі алты вагоннан тұратын пойыз тамыз айының ортасында іске қосылған ұзындығы 11 шақырым жаңа теміржол желісінде қатынай бастады. Бұл бағыт Үргеніш халықаралық әуежайын Хиуа теміржол станциясымен байланыстырады. Пойыздың алғашқы рейсіне Өзбекстан президенті Шавкат Мирзиёев те қатысты.
Пойыз шамамен 400 жолаушыға арналған. Оның пайдалану жылдамдығы сағатына 160 шақырымға дейін жетеді. Вагондарда VIP, бизнес және эконом-класс орындары қарастырылған. Сонымен қатар кондиционер және жылыту жүйелері орнатылып, мүмкіндігі шектеулі жолаушылар үшін қажетті жағдайлар жасалған.
Жаңа бағыт жыл сайын шамамен 650 мың жолаушы тасымалдай алады деп жоспарланып отыр. Жол жүру уақыты шамамен 40 минутты құрайды.
Жобаның жалпы құны 225 миллиард сумға, яғни шамамен 19 миллион долларға бағаланған. Қаражат тек теміржол желісін салуға ғана емес, станция, көпір, автомобиль жолдарымен қиылысатын өткелдер және 25 су өткізу құрылыстарын тұрғызуға жұмсалған.
Айта кетерлігі, Өзбекстанның CRRC компаниясымен осы пойыздарды жеткізу жөнінде келісім жасағаны бұған дейін ресми түрде жарияланбаған.
CR200J Fuxing платформасындағы пойыздар Қытайда 2019 жылдан бері пайдаланылып келеді. Құрамның ерекшелігі сол, оның бір шетінде қозғалтқышы бар бас вагон, ал екінші шетінде басқару кабинасы орналасқан. Осылайша пойызды әр бағытта локомотивті қайта тіркемей-ақ жүргізуге мүмкіндік бар.
Өзбекстан CR200J пойыздары экспортталған Қытайдан тыс екінші мемлекет атанып отыр. Қазір CRRC Малайзияның болашақ East Coast Rail Link теміржол желісі үшін осындай 11 пойыз жеткізу жөніндегі келісімшартты жүзеге асырып жатыр.