Алтынкөл – Жетіген теміржол учаскесін жаңғырту аяқталды

«ҚТЖ» ҰК» АҚ мердігер ұйыммен бірлесіп жұмысты белгіленген мерзімнен 8 ай бұрын аяқтады, деп хабарлайды Rail-news.kz.

Елімізде теміржол инфрақұрылымын жаңғырту бағдарламасы жүзеге асырылуда. Оның аясында жалпы ұзындығы 293 шақырымды құрайтын Алтынкөл – Жетіген учаскесінде жұмыс толық аяқталды. 12 бөлек пункт пайдалануға берілді: 5-еуі жаңадан салынды, тағы 7-сі толығымен қайта жаңартылды. Басқаруды орталықтандырудың микропроцессорлық жүйесін енгізе отырып, жаңа қабылдау-жөнелту жолдарының құрылысы орындалды.

Алтынкөл – Жетіген учаскесі Транскаспий халықаралық көлік бағыты (ТХКБ) халықаралық көлік маршрутының маңызды буыны болып табылады. Оны жаңғырту инфрақұрылымды жаңартудың ұзақ мерзімді стратегиясы шеңберінде іске асырылады және жүк тасымалдарының жылдамдығы мен сенімділігін арттыруға, сондай-ақ елдің транзиттік әлеуетін дамытуға бағытталған. Нәтижесінде учаскенің өткізу қабілеті 80% артты.

Естеріңізге сала кетейік, бұған дейін жалпы ұзындығы 712 шақырым болатын Қызылжар – Сексеуіл теміржол желісіндегі жұмыстар мерзімінен бұрын аяқталған болатын.

Қазіргі уақытта Қазақстанда Ақсу – Жаңа –Семей, Маңғыстау – Бейнеу, Бейнеу – Шалқар, Қандыағаш – Әлімбет, Никельтау – Тобыл учаскелерін жаңғырту жалғасуда. Жаңғыртылатын учаскелердің жалпы ұзындығы шамамен 3 мың шақырымды құраса, оның ішінде бүгінгі күні 900 шақырымы жаңартылды.