Қазақстан темір жолында «Бүйір рамасын бақылау» төрт айлық шарасы басталды
Желтоқсанның 15-інен басталған айлық 15 сәуірге дейін жалғаспақ. Шараның мақсаты – пойыздар қозғалысы қауіпсіздігін қамтамасыз етіп, жүк вагондары тележкаларының құйма бөлшектерінің ақауына жол бермеу.
Елімізде бүйір рамасының жағдайын бақылау үшін 4 айлық шара ұйымдастыруға себеп болған жағдай, соңғы жылдары Қазақстанда осы вагон бөлігінің ақауына қатысты пойыздар апатының көбеюі болып отыр. Тек бізде ғана емес, Ресейде де, қала берді жүк вагондары бір табанды теміржолда жүйткіп жатқан ТМД елдеріне ортақ проблема болып отыр екен. Мәселен, биыл 31 шілдеде Мойынты-Шығанақ телімінде жүк вагондарының жолдан шығып кету оқиғасына осы ақаулы бүйір рамалары себеп болған.
Сондықтан ұлттық компания әкімшілігі ҚР ИДМ-нің 2015 жылдың 26 наурызындағы «Темір жол көлігінде қауіпсіздік ережелерін бекіту туралы» бұйрық ережесіне сәйкес «Азовэлектросталь» зауытынан 2009 жылы жасалып шыққан бүйір рамаларын пайдаланудан алып тастау туралы ұсыныс жасады. Алайда мұны жүзеге асыруда заң тұрғысында бірқатар кедергілер туындауы мүмкін екен.
Уәкілетті органдардың өкімінсіз ҚТЖ жеке операторлардың аталған бүйір рамаларын қолдануына тыйым сала алмайды. Сондықтан , жеке операторлардың осы зауыт өнімдерін, аталған вагон бөлшегін тәжірибеде қолдануы жалғасып жатыр. Қазақстандық теміржолшылардың айтуынша, бүйір рамасының сынуы жағынан «Азовэлектросталь» және «Кременчугский сталелитейный завод» кәсіпорындары көш бастайды. Қазақстан аумағында сынған рамалардың жалпы саны 2010 жылдан бергі уақытта 85 жағдайды құраған. Олардың бәрі – «Кременчугский сталелитейный завод» пен «Азовэлектросталь» кәсіпорнында жасалып шыққан өнім. Ал биыл алғашқы жартыжылдықта Астана вагон пайдалану депосының жұмысшылары жүргізген жоспарлы жөндеу барысында 36000 раманың 1412-нен бүйір рамасының ақауы табылған.
Жалпы бүйір рамасы ақауының көбейіп кетуі себептерінің негізгі нұсқаларына раманы құю сапасының төмендеуі немесе дұрыс емес құрастырымдық шешімдер жатады. Мәселен, бүйір рамасын құрастыруда 1990 жылдар соңында өзгерістер болып, консоль бөлігінің қимасы қос таврлы түрінен қорапты түріне ауыстырылған болатын.
Сондықтан аталған айлыққа «ҚТЖ» ҰК» АҚ мен оның барлық филиалдары, «Жүк тасымалы» АҚ, Магистралдық желі дирекциясы, тағы басқа барлық құрылымдық бөлімдер мен өндірістік телімдер түгел атсалысуы қажеттігі атап өтілген.
Райхан РАХМЕТОВА