Тарихтың көзі тірі куәгері

Жаңалықтар

16.02.2018, 18:31

Жамбылдық қарт теміржолшы, ҰОС ардагері Михаил Гладченко 95 жасқа толып отыр. Көзі тірі санаулы соғыс ардагерінің бірі Михаил Петровичті туған күнімен құттықтап барған ЖТ-Жамбыл бөлімшесі кәсіподақ ұйымының төрағасы Серік Ақшораев, Тараз қалалық ардагерлер кеңесі төрағасының орынбасары Күләш Әбдікешова қарияға ақ тілектерін білдіріп, сый-сияпаттарын ұсынды. Михаил Гладченко 1923 жылы Луговой станциясында өмірге келген. Соғысқа дейін «Восток» колхозында механизатор болып еңбек еткен ол 1942 жылдың басында майданға аттанады. Үш айлық оқу-жаттығу шараларынан соң 7-ші танкіге қарсы атқыштар бригадасы құрамында 32-ші атқыштар полкінде ұрысқа кіреді. 1942 жылдың қазан айында сарбаз Михаил Гладченко майдандастарымен жау қоршауында қалады. Үш жақтан қысқан жаудың күші тым қуатты болады. Осы кескілескен ұрыста жауынгер Михаил жарақат алады. Алайда, адам санының азайып бара жатқанын байқаған сарбаз жарақатын таңдырып алып, қайта ұрысқа кіріседі. Кескілескен ұрыста кеңес әскері ақыры жаудың қоршауын бұзып шығады. Михаил басынан алған жарақатына орай госпитальда ем алады. Ұрыс даласындағы көрсеткен ерлігі үшін сарбаз «Ерлігі үшін» медалімен марапатталады. Госпитальден шыққан соң 10-атқыштар полкінің 267-ротасында соғысады. 1943 жылдың қазан айында Днепр өзені үшін болған кескілескен ұрысқа қатысады. – Осы Днепр өзені үшін болған ұрыста мен өзенді тоғыз рет ары-бері кешіп өттім. Өлім мен өмір арпалысқан соғыста бұл үлкен қатер болатын. Өйткені, кез келген уақытта қаңғыған оққа ұшуың мүмкін. Соңғы тоғызыншы рет өзеннен өтіп бара жатқанымызда біз мінген қайықтың жанынан жау снаряды жарылды. Есімді тек осы ұрыстан жүз күн өткенде ғана жидым. Осыдан соң мені арнайы комиссия қарап, елге қайтарды, - дейді ардагер. Михаил Гладченко елге келген соң өзі туған Луговой станциясында әскериленген темір жол күзетінде еңбек етеді. Одан бергі жылдары біраз жыл теміржолды сумен қамту дистанциясында еңбек етіп, 1983 жылы зейнетке шығады. Бүгінде ұл-қызынан екі немере сүйіп отырған қарт майдангер өзін туған күнімен құттықтай келген теміржолшыларға алғысын жеткізді. Өз кезегінде қонақтар тарихтың көзі тірі куәгерінің әңгімесін тыңдап, бір жасап қалғандарын жасырмады.

Тарихтың көзі тірі куәгері

Басқа да жаңалықтар

Қазақстан теміржолшысы газеті, №16 03 наурыз 2026 жыл