Белгісіз біреулер Көкпекті – Нұра аралығындағы жолдан бекітпе болттарды ұрлап кеткен
2024 жылғы 24 қарашада Көкпекті – Нұра аралығында теміржолшылар ұзындығы 500 метр учаскеде рельстің ішкі жағынан бекіту болттарының ұрланғанын анықтады. 131 бекітпені ұрлау пойыздардың қауіпсіздігіне қауіп төндірді, бұл вагондардың апатқа ұшырауына әкелуі мүмкін еді, деп хабарлайды Rail-news.kz.
Теміржолшылар ІІЖБ (Ішкі істер желілік бөлімшесі) қызметкерлерін дереу хабардар етісімен олар оқиға орнына жедел жеткен. Салдардың алдын алу және қозғалыс қауіпсіздігін қамтамасыз ету мақсатында осы учаскеде пойыздардың жылдамдығын уақытша шектеу енгізілді.
ҚТЖ темір жолдардағы қауіпсіздікті қамтамасыз ету үшін барлық қажетті шараларды қабылдайды.
Осыған ұқсас жағдай 2024 жылғы 3 қарашада Отар – Шилібастау аралығында тіркелді, онда белгісіз адамдар жолдың жоғарғы құрылымының 2745 бірлік материалын (SKL-14 бекіткіштері, бұрандалар, бұрышты бағыттағыштар, серпімді клемдер) ұрлап әкетті.