Оқушылар мен колледж студенттері теміржолшы мамандығымен етене танысты
Астана қаласының оқушылары мен колледж студенттері кәсіптік бағдар беру экскурсиясы аясында "ҚТЖ" ҰК" АҚ филиалы - "Теміржол көлігі персоналын бағалау және дамыту орталығы" базасында болып, теміржолшылардың жұмысымен танысты, деп хабарлайды Rail-news.kz.
Аталған шара жоғары сынып оқушыларының мамандық таңдауына бағдар беру аясында жүргізіліп отыр. Жиын барысында компанияның адами ресурстарды басқару департаментінің HR бизнес-серіктесі Алма Сәулебаева жастарға ҚТЖ-ның барлық құрылымдары жайлы ақпарат беріп, онда қандай мамандық иелері қызмет етіп жатқанын кеңінен баяндап берді.
"ҚТЖ" ҰК" АҚ филиалы - "Теміржол көлігі персоналын бағалау және дамыту орталығы" директорының орынбасары Виктор Отрощенко орталыққа жыл сайын оқушылар мен студенттер келіп, теміржолшы қызметімен етене танысып тұратынын жеткізді.
«Қазір сіздер мамандық таңдау алдында тұрсыздар. Мамандығын қателеспей таңдаған адамдар қызметте жетістікке жетеді, тіптен ол өмірлік жолдарыңызға дұрыс бағыт береді. Сол үшін біз бүгін темір жол саласы сіздерге қандай мүмкіндіктер беретінін түсіндіріп, бұл мамандық үшін қандай білім қажет екенін айтқымыз келеді. Темір жол саласы тек пойыз жүргізу ғана емес, бүтіндей экономикалық жүйе. Онда жүз мыңдаған адам қызмет етіп жатыр. Қазір бізде инновациялық технология дамып, жаңа локомотивтер мен жабдықтар енгізіліп жатыр. Әсіресе сандық технология жоғары қарқынмен енгізілуде. Сондықтан бізге өте сауатты мамандар қажет. Жалпы біздің орталықтан жылына 23 мыңнан астам қызметкер оқудан өтіп, біліктіліктерін арттырып отырады», - дейді В. Отрощенко.
Сондай-ақ жиын барысында темір жол саласында 40 жылдан астам қызмет еткен зейнеткерлер өз тәжірибелерімен бөлісіп, болашақ мамандарға жол саласының қыр-сырын баяндап берді. Ал, жастардан "ҚТЖ 100 жас есім" жобасының қатысушысы Саят Мақсұт жетістікке жетудің жолдарымен бөлісіп, қазір жастар үшін қандай әлеуметтік жобалар іске асырылып жатқанын айтып берді.
«Мен қазір 33 жастамын, соңғы 15 жылдан бері ҚТЖ-да еңбек етіп келемін. Осы аралықта мен кең көлемді жобаларға қатыстым, соның арқасында ҚТЖ-дағы көптеген жұмыс процесін оңтайлы ете білдім. Мәселен, диспетчерлік басқаруда пойыздардың қозғалысын талдауды цифрландырдық. Сондай-ақ отын шығынын есептеуді оңтайландырдық. Оған қоса Е-телеграм қызметін енгізуге атсалыстым. Өзім IT саласының маманы болғаныммен атам темір жолда қызмет еткен жан. Енді оның жолын қуып мен де темір жол саласында еңбектеніп жатырмын», - деді С. Мақсұт.
Жастармен кездесуге Мұхамеджан Тынышбаев атындағы ALT Университеті, Астанадағы көлік және коммуникация колледжінің өкілдері де келді. Олар оқу ордаларында жастар үшін қандай жағдай жасалғанын, қандай мамандықтар оқытылып жатқаны туралы кеңінен баяндап берді. Сонымен қатар ҚТЖ өкілдері де компанияға қалай жұмысқа тұруға болатынын және қандай мамандықтарға сұраныс жоғары екені жайлы айтты.
Келелі жиын мамандық таңдау алдында тұрған жастар үшін өте мағыналы болды десек болады. Өйткені темір жол саласын оқытушылар мен жұмыс берушілер өз тараптарынан толыққанды ақпарат бере білді.
Дильназ Айдарбекова