Бос орындар жәрмеңкесі өтті

«Самұрық-Қазына» АҚ-ның ұйымдастыруымен аталған қоғамның 6 компаниясынан «Болашақ» бағдарламасының шәкіртақы иелері мен «Болашақ» ассоциациясы мүшелеріне арналған бос орындар жәрмеңкесі онлайн форматта өтті. Іс-шараға қатысқандарға «Самұрық- Қазына» АҚ, «ҚТЖ» ҰК» АҚ, «Эйр Астана» АҚ, «Қазатомпром» ҰАК» АҚ, «Такен-Самұрық» АҚ, «КМГ Инжиниринг» ЖШС өкілдері өз компанияларындағы негізгі бағыттар мен жастардың қызметте өсу мүмкіндіктері, жұмысқа сәтті орналасуға арналған ұсынымдар туралы айтты. Мәселен, «ҚТЖ» ҰК» АҚ-ның Адами ресурстарды басқару департаментінің бас менеджері Замир Серіковтің айтуынша, ҚТЖ – Қазақстандағы ең ірі жұмыс беруші және ең үлкен тармақталған желі. 2024 жылы Қазақ теміржолының 120 жылдығы атап өтіледі. – Жүк айналымының көлемі мен табыс жағынан ҚТЖ әлемдегі 15 ірі темір жол компаниясының құрамына кіреді. Бүгінде компанияда 113 мың жұмысшы еңбек етсе, соның 40 мыңы – жастар. Қазақстандағы күре жолдар ұзындығы 21 мың км болса, соның ішіндегі қолданыстағы жол ұзындығы – 16 мың км. ҚТЖ 48 кәсіпорынның акциясына ие. Осындай ірі компанияда жалақы үнемі тұрақты беріледі, бізде оқыту жүйесі жақсы жолға қойылған, әлеуметтік пакет те қомақты, корпоративтік мәдениет қалыптасқан. Біздің корпоративтік құндылықтарымыз БЛАГО сөзінің аясына топтасады, – дей келе ол осы құндылықтар мәні ашып көрсетілген арнайы бейнероликті көпшіліктің назарына ұсынды. Қатысушылар тарапынан ҚТЖ компаниясына тәжірибесі жоқ жастардың жұмысқа ала ма деген сұрақ қойылды. З.Серіковтің айтуынша, көбіне өндірістік саласына тәжірибесі жоқ теміржолшылар қабылданады. Бос жұмыс орындарына келсек, ҚТЖ-да былтыр жұмыс іздеу және жинақтау қызметі орталықтандырылды. 10700-ден астам бос жұмыс орны жабылды. Компаниядағы бос жұмыс орындары туралы qsamruk.kz және rabotanur.kz порталдарынан оқып білуге болады. Компанияның осы бағыттағы жекеменшік платформасы қыркүйек айында құрылады.