«Пойыз+Пойыз» қызметі арқылы 20 мыңнан астам билет рәсімделді
Ұлттық тасымалдаушының «Пойыз+Пойыз» қызметі арқылы жолаушылар 20 мыңнан астам билет рәсімдеді. Қызмет ресми bilet.railways.kz сайтында қолжетімді, деп хабарлайды Rail-news.kz.
Ол тікелей рейстерге орын болмаған жағдайда немесе қатынас мүлде жоқ бағыттарда жолаушыларға ыңғайлы маршруттарды автоматты түрде таңдап береді.
Қызметті пайдалану үшін жолаушы сайтқа кіріп, жөнелту мен келу станциясын көрсетеді. Жүйе бірден қолайлы бағыттарды ұсынып, билетті онлайн рәсімдеуге мүмкіндік береді. Бұдан бөлек, сайтта автобус билеттерін де қатар сатып алуға болады.
«Пойыз+Пойыз» – жолаушылар тасымалында енгізіліп жатқан хабтық жүйенің бір бөлігі. Ұлттық тасымалдаушы кезең-кезеңімен дамытып отырған хабтық жүйе қазірдің өзінде алғашқы нәтижесін көрсетуде. Оның айқын мысалы – Астана – Бурабай бағыты. Бұл бағытта қатынайтын «Burabay express» электрпойызының кестесі курорт пен қонақүйлердің жұмыс уақытымен үйлестірілген. Бұл жолаушылардың жол жүруін әлдеқайда жеңілдетіп, демалыстарын алдын ала жоспарлауға мүмкіндік берді.
Алдағы жылдары хабтық жүйені еліміздің барлық өңірлеріне де кеңейтілмек. 2026 жылдан бастап қала маңы мен алыс бағыттағы пойыздарды интеграциялау көзделуде. Кестелерді сәйкестендіру мен аялдамаларды оңтайландырудың арқасында жолаушыларға пойыздан пойызға ауысып отыру жеңілдейді, ал сапар уақыты қысқарады. Жобаны іске асыруға халықаралық DB Engineering & Consulting мамандары тартылып отыр. Бұл Қазақстанның көлік жүйесін дамытуға әлемдік үздік тәжірибелерді енгізуге жол ашады.