Полиция қызметкерлері оқушыларға жол қауіпсіздігін түсіндірді
Маңғыстау облысы бойынша меншікті тілші
17-25 мамыр аралығында еліміз көлемінде «Қауіпсіз жол» жедел-профилактикалық іс-шарасы өткізілді. Осы науқан аясында Сайөтес станциясындағы көліктегі полиция бөлімшесінің қызметкерлері мектеп оқушыларымен кездесіп, арнайы дәріс өткізді.
Сайөтес ауылының учаскелік инспекторымен бірге теміржол қауіпсіздігін нығайту мақсатында өткен кездесуге «Өтес» орта мектебінің 9-11 сынып оқушылары мен олардың ата-аналары және мұғалімдер қатысты.
Басқосудың мақсаты – мектеп бітіріп жатқан түлектерге жолда жүру кезінде сақтық шараларын сақтауға, заңсыз көлік құралдарын басқармаға шақырып, жазғы демалыс қарсаңында жасөспірімдердің теміржол нысандарындағы қауіпсіздік ережелерін қатаң сақтауын қамтамасыз ету, жазатайым оқиғалардың алдын алу.
– Аталған бағыттағы іс-шаралар барысында полиция қызметкерлері оқушыларға теміржол маңында өзін-өзі ұстау ережелерін егжей-тегжейлі түсіндірдік. Әсіресе рельстерден белгіленбеген орындарда өтпеу, рельс үстінде селфи жасамау және теміржол маңында құлаққап киіп жүрудің аса қауіпті екеніне ерекше тоқталдық. Сондай-ақ жоғары сынып оқушыларына құқық бұзушылықтың соңы әкімшілік жауапкершілікке әкеліп соғатыны туралы да ескертілді. Мұндай маңызды кездесулер жасөспірімдердің құқықтық сауаттылығын арттырып, оларды қауіпсіздік ережелеріне жауапкершілікпен қарауға дағдыландырады, – дейді Сайөтес станциясындағы желілік полиция бөлімшесінің басшысы Нұрлыбек Рахметов.