Жүлдеге лайық жәдігер

Отандық темір жол тарихынан сыр шертетін мұражайлар жол бөлімшелерінің бәрінде бар. Тіпті байырғы деполардың ғасырлық шежіресінен сыр шерткен музейлер қайсыбір локомотив және вагон деполарында да бар.

Жамбыл жол бөлімшесінің мұражайы Ұлы Жеңістің 80 жылдығына арналған Қоғамдық музейлер, әскери және Еңбек даңқы бөлмелері мен бұрыштары арасында өткен қалалық байқауда жүлделі 2-орынды иеленді. «Қазтеміржолкәсіп» ҚБ Жамбыл филиалының төрағасы Ерболат Жидебаев байқауда Әулиеата өңіріндегі теміржол саласының тарихынан сыр шертетін деректер мен жәдігерлерді жинақтап, көптің назарына ұсынған мұражай қызметін жоғары бағалап, музей меңгерушісі Мээрим Қанатованы арнайы қабылдап, алғыс айтты. Жамбыл жол бөлімшесіндегі музейдің жұмысын үйлестіру әрі дамыту - кәсіподақ ұйымының сан салалы жұмысының бір бағыты екенін атап өтті.  

Байқауға 40-тан аса ұйым мен мекемелер қатысты. «Үздік мұражай + Әскери даңқ бөлмелері» номинациясы бойынша 1-орынды Тараз теміржол және коммуникация колледжі мен шаһардағы Бауыржан Момышұлы атындағы 45 қазақ классикалық гимназиясы иеленді. 2-орынды Жамбыл теміржол бөлімшесі еншілесе, 3-орын Т.Рысқұлов атындағы №48 орта мектептің мұражайына бұйырды. Ал «Үздік мұражай + Әскери даңқ бұрыштары» номинациясында М.Х.Дулати атындағы Тараз университеті және Әлихан Бөкейханов атындағы №1 гимназиясы алға шықты.  

- Алты жыл бұрын ашылған музейдегі жәдігерлердің басым бөлігі Жамбыл локомотив пайдалану депосындағы мұражайдан көшірілді. Музейдің төрттен бір бөлігіне Ұлы Отан соғысына қатысқан майдангер-теміржолшылардың әскери құжаттары мен наградалары қойылған. Темір жолдың арғы-бергі тарихынан бастап тәуелсіздік жылдарына дейін арнайы бұрыш бар, - дейді «Қазтеміржолкәсіп» ҚБ Жамбыл филиалының музей менеджері Мээрим Асылбекқызы.