Атырау теміржол музейі жаңа есіммен толықты

Жуырда Атырау магистральдық желі бөлімшесінде орналасқан өлке темір жолынан сыр шертетін музейде игілікті іс орын алды. Онда аймақ теміржолына көп жыл еңбегі сіңген Құрметті теміржолшы Ізғұлов Жарас Төкенұлына арналған бұрыш ашылды.

Жарас Ізғұлов 1971 жылы 28 қыркүйекте Гурьев облысы Қызылқоға ауданы Миялы селосында қарапайым отбасында дүниеге келген. 1978-1989 жылдары сондағы қазақ орта мектебін бітіріп, 1990-1995 жылдары Самара институтын теміржол көлігінің инженері мамандығы бойынша бітіріп, еңбек жолын 1995 жылы Атырау станциясында пойыз құрастырушының көмекшісі болып бастаған. 1995-1997 жылдар аралығында станция бойынша кезекші, 1997-1998 жылдары пойыз диспетчері, ал 1998-1999 жылдарда Атырау станциясы бастығының орынбасары болды. 1999-2000 жылдары Атырау станциясының бас инженері, 2001 жылы Маңғышлақ станциясының бастығы, 2001-2005 жылдар аралығында Атырау жол бөлімшесінің бастығы қызметін атқарды. Осы жылдарда өлке темір жолының дамуына өзіндік үлесін қосып, өндіріспен қатар әлеуметтік саланың дамуына да атсалысты.  

2005-2015 жылдары «ҚТЖ» ҰК» АҚ Ақтөбе жол бөлімшесінің директоры, 2015-2017 жылдары «ҚТЖ» ҰК» АҚ «Магистральдық желі дирекциясы» филиалының директоры, 2018 жылдан «Integra Construction KZ» ЖШС бас директоры қызметін атқарды. 2012 жылы «Құрмет» орденімен, 2016 жылы ҚР Құрмет грамотасымен, басқа да мемлекеттік наградалармен марапатталған. Жарас Төкенұлы 2025 жылдың күзінде жол апатынан қайтыс болды.  

Музейден бұрыш ашылу салтанатына марқұмның анасы Қаламқас, жары Жаннат, ұл-қыздары, туған-туысқандары, бірге еңбек еткен әріптестері қатысты. Жарас Атырауда еңбек еткен жылдары бөлімшеде кадр бөлімінің бастығы болған Досжанов Тоқтарбай ағай сол жылдардан естелік айтып, өлке теміржолына бір кісідей еңбегі сіңген азаматтың рухына көрсетіліп отырған құрметті құптайтынын жеткізді.  

– Жарас еңбекқор, талапшыл, алғыр болатын, жасаған жұмысынан нәтиже шығарғанша тыным таппайтын. Өзінің сол қайсарлығымен, білімімен көріне білді. Оған зор сенім арттық, сол сенімді ол ақтады, үлкен лауазымдарды жауапкершілікпен атқара білді. Өмірден қыршын кеткенін естігенде «әттеген-ай» деп қалдық. Жазғанға шара бар ма? Теміржолшылар музейінен оған арнап бұрыш ашып отырған бастаманы қолдаймыз, өскелең ұрпақ оның есімін ұмытпауы керек, – деді ақсақал. Бұрышқа Жарас Ізғұловтың өмірбаяны, мемлекеттік наградаларының көшірмелері, Алғыс хаттар мен Құрмет грамоталары, теміржолшы куәліктері, еңбек жолынан сыр шертетін фотосуреттері қойылған.