Түркістан теміржолында тіршілік қайнап жатыр
Шымкент қаласы бойынша меншікті тілшісі
Төрт жыл бұрын облыс орталығына айналған Түркістанда бүгінде қарбалас тірлік. 2 парктен тұратын, 16 жолы бар 1 класты телімдік станция Қызылорда – Шымкент бөлімшелері арасындағы шекаралық бекет рөлін де атқарып тұр.
Түркістан – Қызылорда және Түркістан – Арыс бағытында телімдік немесе құрама пойыздар құрастырылатын станцияда жүзден астам теміржолшы еңбек етеді. Мекемеде барлық еңбек қорғау ережелері мен заңдылықтары қатаң қадағаланып, нормативтік талаптардың сақталуына бақылау жасалады. Жұмыс барысында қолданылатын құрал-саймандардың жарамдылығы, жеке қорғаныс құралдарының пайдаланылуы, арнайы киім-кешекпен қамтылуы, зиянды өндірістегі теміржолшыларға сүт өнімдерінің берілуі, ауысымалды медициналық тексеру үнемі бақылауда.
Түркістан станциясын көп жылдан бері тәжірибелі теміржолшы Қадыр Сырлыбеков басқарып келеді. Биылғы жылдың алғашқы үш айында станциядан 214 вагон жүк артылып, 2109 вагон жүк түсірілген. Жалпы вагонайналымы 2323 вагонды құраған. Осы үш айда Павлодарға 60-тан астам вагон қара металл сынықтары жөнелтілген, Қызылордаға оншақты вагон қиыршық тас, ал Ақтау портына екі вагон кебек жіберілген. Бұдан бөлек, Петропавлға күнбағыс майы, шитті мақта, Қарағандыға маргарин майы, Шымкентке ағаш материалдары, Кентаудан трансформатор зауытының жүктері артылған. 37 вагон «Қазтеміртранс» АҚ меншігіне тиесілі, қалғаны жекеменшік және жалға алынған вагондар.