Шиелі станциясы өндірістік жоспарды межеден асыра орындады
Қызылорда облысы бойынша меншікті тілші
Шиелі станциясы өндірістік тапсырмаларды межеден асыра орындауға дағдыланған. Әр ай сайын шығарылатын өндірістік жұмыс нәтижесіне қарай күнделікті тапсырмалар легінің нобайын жасайтын шиелілік теміржолшылар үшін бекітілген жоспарды орындауға еш кедергі жоқ.
Жұмыстың сауатты ұйымдастырылуы, жұмысқа қажетті киім-кешек, құрал-сайманмен дер кезінде қамтамасыз етіліп, еңбек жағдайының жасалуы да көрсеткіштердің жоғары болуына әсер ететіні сөзсіз.
Шиелі станциясының бастығы Нұрғали Әбжаппаров өндірістік көрсеткіштер 104 пен 147 пайыз аралығында орындалып отырғаны – ең алдымен әріптестерінің кәсіби міндетке адалдығы мен жауапкершілігінің нәтижесі деп біледі.
– Кез келген табысты жұмыс ең алдымен жауапкершіліктен басталады. Биылғы 8 айдағы көрсеткіштерге тоқталсақ, 3339 вагонның орнына 5218 вагонға жүк тиелді. Станцияға келген 410 пойыздан 18 681 вагон ажыратылып, 381 пойызға 15 303 вагон тіркелді. Жүк операциясы жасалмай бос тұруға бекітілген 2,80 сағаттық меже 8 айда 2,27 сағатқа жеткізіліп, жоспар 123 пайызға орындалған. 11,0 сағатқа бекітілген бір жүк операциясын жүргізу кезінде вагонның бос тұруы 8 айда 10,23 сағатқа дейін азайтылып, жоспар 107 пайызға орындалды. Жалпы жұмыстың тиімділігін арттыруға әр ауысымдағы теміржолшылар өз үлесін қосуда. Ал біз оларды жұмыс кезінде ештеңе алаңдатпай, тек қана өндірістік жұмысты нәтижелі атқаруына жағдай жасаймыз, – дейді станция бастығы Нұрғали Әбжаппаров.
Негізгі магистральдың бойында жатқан байырғы станцияда еңбек ететіндердің дені теміржолшы кәсібін атадан балаға мирас еткен әулеттен шыққан. Олардың қатарында станцияға келетін пойыздар құрамының шашауын шығармай қарсы алып тиісті жолға тоқтауын, одан кейін құжаттарына қарай тиісті жүк операциясының рәсімделіп, жолға шығарылуына мүмкіндік жасайтын станция кезекшісі Алижағыпар Шауенов, құжаттарды өңдейтін оператор Бағжан Нұртазаева, станция кезекшісінің пәрменімен вагондарды пойыз құрамынан ажыратып немесе қайта жасақтайтын пойыз құрастырушы Бексұлтан Тұрсыманов, бүкіл вагонның реттік нөмірінен бастап қай станцияға жөнелтілетініне дейін жадында сақтай алатын парк кезекшісі Ислам Қарамырзаев бар.