Ғасырдан асқан Шиелі вокзалы: кеше және бүгін

Мемлекет басшысының тапсырмасы бойынша еліміздің теміржол вокзалдарын жаңғырту бағдарламасы шеңберінде Шиелі теміржол вокзалы да жаңа келбетке ие болды. Ғасырдан астам уақыт бойы теміржол көлігіне қызмет көрсетіп келе жатқан тарихи нысанның сәулеттік болмысы сақталып, жолаушыларға көрсетілетін қызмет сапасы заманауи талаптарға сәйкестендірілді.  

Шиелі дегенде Сыр бойының шежірелі тарихы мен қайнаған еңбек тынысы еске түседі. Ал осы өңірдің тарихымен біте қайнасып келе жатқан нысандардың бірі – Шиелі теміржол вокзалы.

ХХ ғасырдың басында Орынбор – Ташкент теміржолы магистралінің бойында бой көтерген вокзал 1903 жылдар шамасында пайдалануға беріліп, содан бері жергілікті тұрғындар мен жолаушыларға үздіксіз қызмет көрсетіп келеді. Көне ғимарат – теміржол тарихының ғана емес, Шиелі өңірінің әлеуметтік-экономикалық тынысының да өзіндік куәсі.

Өткен ғасырдың басында іргетасы қаланған вокзал ғимараты өзінің тарихи сәулеттік ерекшелігін әлі күнге дейін сақтап келеді. Шығыс сәулет өнеріне тән өрнектік нақышымен ғимараттың өзіндік келбеті оның тарихи нысан ретіндегі қадірін арттыра түседі. Сондықтан мұнда жүргізілген жаңғырту жұмыстарының басты ерекшелігі – вокзалдың тарихи болмысын сақтай отырып, оның қазіргі заман талабына сай қызмет көрсету мүмкіндігін кеңейтуінде.

Қайта жаңғыртылып жаңарған вокзалдың іші де, сырты да ерекше сәулеттеніп, жолаушыларға қолайлы жағдай жасалды. Бұрынғы қызметтік орындар кеңейтіліп, бірнеше жаңа жұмыс бөлмелері пайдалануға берілді.  

– Жолаушылардың әлеуметтік қажеттіліктеріне айрықша көңіл бөлінген вокзалда ана мен бала бөлмесі, мүмкіндігі шектеулі жандарға арналған арнайы бөлме жабдықталды. Ғимараттың қала жақтағы кіреберісіне мүгедектердің қоларбасын пайдаланатын жандарға арналған көтергіш орнатылып, қолжетімділікті қамтамасыз ететін пандус жасалған. Сонымен қатар вокзалда медициналық пункт қарастырылған. Ғимарат кіреберісіне мүмкіндігі шектеулі жандардың қоларбасын көтергіш құрылғысы орнатылған. Жалпытеміржолшылардың, жолаушылардың қауіпсіздігі үшін барлық қолайлы жағдай жасалған, – дейді қайта жаңғыртудан өткізіліп, су жаңа қалыпқа енгізілген Шиелі вокзалының бастығы Алмат Досымов.

Ғимарат пен оның айналасының қауіпсіздік мәселесі де назардан тыс қалмаған. Ғимараттың іші мен сыртына, перронға және жолаушылар платформасына бейнебақылау камералары орнатылып, жолаушылардың қауіпсіздігін қамтамасыз ету мүмкіндігі күшейтілген.

Шиелі вокзалында жолаушыларға көрсетілетін қызметтің қалыпты жүруін вокзал ұжымы қамтамасыз етеді. Станцияға аялдайтын 13 жұп пойызынан түскен-мінген жолаушылардың сұранысын қамтамасыз етіп отырған вокзал ұжымының дені – қыз-келіншектер. Вокзал бастығы Алмат Досымов бастаған ұжымның жұмысы сырт көзге қарапайым көрінгенімен, оның артында үлкен жауапкершілік жатыр. Вокзал бастығының кезекші көмекшілері Досмат Оңғаров, Бибігүл Сұлтанбайқызы, Сауле Тұрсынбекова және Гүлзат Палымбетова пойыздардың кестеге сәйкес қабылданып-жөнелтілуіне, жолаушылар қозғалысының қауіпсіздігіне қатысты жұмыстарды үйлестіреді. Шебер Ғафур Бекжанов ғимарат пен оның айналасындағы техникалық жабдықтардың талапқа сай қызмет жасауын тексеріп, аумақтың жай-күйін қадағалап отырса, анықтама беру жөніндегі кезекшілер Гүлжанат Палманова, Гүлшат Шултикова және Элеонора Сарина жолаушыларға қажетті ақпаратты ұсынып, пойыздарға қатысты сауалдарға жауап береді. Бірі пойыз қозғалысының тәртібін бақылайды, бірі жолаушының сұрағына жауап береді, енді бірі вокзалдағы қауіпсіздік пен тәртіптің сақталуына атсалысады. Сырт көзге бөлек-бөлек көрінетін осы жұмыстардың барлығы бір мақсатқа-жолаушыға қауіпсіз әрі сапалы қызмет көрсетуге тоғысады.

Шиелі вокзалының бір ерекшелігі оның тарихи келбеті мен қазіргі қызметінің өзара үйлесім табуында. Өткен ғасырдың архитектурасы мен заманауи талапқа сай қызмет көрсетілетін бүгін тамаша үйлесім тапқан.  

Жаңарған вокзалдағы жұмыс орындары барлық қызметкерлердің көңілінен шығады. Олар үшін өз міндеттерін мінсіз атқару үшін көптеген   қолайлы мүмкіндік бар.