Жұмыс қарқыны жоғары
Қызылорда облысы бойынша меншікті тілші
Қазалы станциясы – Қызылорда облысындағы ең маңызды теміржол торабының бірі. Станцияның жұмыс кестесі өте тығыз, себебі бұл бекет аудан орталығы мен өндірістік аймаққа қызмет көрсететін стратегиялық маңызы бар нүкте болып табылады.
Өндірістік көрсеткіштерді жоғары деңгейде орындауда қазалылықтар теміржолшылар алдына жан салмайды. Ақпан айының өзінде жүк түсіру жоспарын 136,6 пайызға асыра орындады. Мұндай нәтиже станцияға келетін жүк вагондарының уақытылы өңделуімен, жедел рәсімдеу және құжаттау процестерінің кәсіби деңгейде орындалуымен тікелей байланысты. Сондай-ақ вагонға тапсырыс берушілермен тиімді әріптестік орнату бұл көрсеткіштерді арттыруға оң ықпал еткен.
Одан бөлек, ақпан айында Қазалы станциясында 78 пойыз бөлшектеліп, 15 пойыз құрастырылды, 4694 вагон ажыратылып, 4592 вагон қайта тіркелді, ал 233 вагон кірме жолдарға жөнелтілді. Бір айда атқарылған жүк тасымалы мен өңдеу жұмыстарының осыншама ауқымды жүктемесін жоғары деңгейде игеру жергілікті теміржолшылардың кәсіби біліктілігін, кәсіби деңгейін айғақтайды.
Қазалы станциясы бастығының орынбасары Руслан Мақашевтың айтуынша, Әйтеке би кенті мен қаламен іргелес орналасуы станцияда өндірістік жұмыстардың тәулік бойы үздіксіз жүруіне әсер етеді. Ұжым мүшелері бұл қарқынды жұмысқа әбден бейімделген, әрқайсысы өз міндетін мінсіз атқаруға дағдыланған.
– Бізде жұмыс қарқыны қашан да жоғары. Өткен айда өндірістік көрсеткіштерді асыра орындадық. Мысалы, бір жүк операциясы кезіндегі вагонның бос тұру уақытын 7,8 сағаттан 7,12 сағатқа дейін қысқартып, жоспарды 109,5 пайызға орындадық, – деген Руслан Мақашев станция кезекшілері Өмірбай Қарабеков, Мейірбек Малиевтің, пойыз құрастырушылар Мейрамбек Құлмұратов, Мұрат Асылқанның, парк кезекшілері Еркін Үсенбаев, Сакен Ибраев, Асия Мектепова және Талғат Көшекбаевтың еңбегін ерекше атап өтті.
