ТЖ режиміне байланысты жүк тасымалымен айналысатындарға жеңілдіктер жасалды
Елдегі саяси қақтығыстар кезінде теміржол инфрақұрылымы нысандарына залал келген жоқ. Бүгінде Ұлттық компанияның барлық құрылымдық бөлімшелері толыққанды жұмыс істеп тұр.
ҚТЖ Қазақстанның барлық өңірлерінде төтенше жағдай кезеңінде жүк тасымалымен байланысты айыппұлдарды, алымдарды және төлемдерді алып тастады. Бұл шешім ҚР «Темір жол көлігі туралы» Заңы аясында, ҚР «Атамекен» ұлттық кәсіпкерлер палатасының үндеуін ескере отырып қабылданды. Сонымен, жүк тасымалдау жоспары бойынша өтінімді орындамағаны үшін айыппұл салынбайтын болса, жүк жөнелтушілердің, жүк алушылардың, тармақ иеленушілердің, вагондар иелерінің кінәсінен болған, меншікті немесе жалға алынған вагондардың бос тұрғаны, магистральдық, станциялық жолдарда контейнерлердің кідіргені үшін төлем де есептелінбейтін болады.
Бұдан басқа форс-мажорлық жағдайларға байланысты жүк алушыларға жүктің межелі станцияға келгені туралы хабарланған сәттен бастап 48 сағаттан артық тұрып қалған жүктерді сақтағаны үшін алым 10 еселік көрсеткіште емес, бір еселік мөлшерде алынбақ. Десе де, бұл жеңілдіктердің елдегі төтенше жағдай кезеңінде ғана жасалып отырғанын ескерген жөн.