Жамбыл жүк тасымалы бөлімшесі 5 айда 15 млрд теңге табыс түсірді

Жамбыл жүк тасымалы бөлімшесі еңбек қорғау және пойыздар қозғалысы қауіпсіздігін қамтамасыз ете отырып, тасымалды тиімді ұйымдастыру арқылы кіріс деңгейін арттыруда.

Оған олар жүк тасымалы көлемін ұлғайту бойынша негізгі жүк жөнелтушілермен бірлесе жұмыс істеп және жаңаларын тарту арқасында қол жеткізіп келеді. Оның жарқын көрінісін, жалпы 2022 жылдың 5 айында жүк тасымалынан түскен табыстың 15 млрд теңге шамасын құрауынан көреміз. Сонымен қатар, бөлімше ұжымы өткен бес айды табысты көрсеткішпен тәмамдап отыр. Айталық, жүк айналымы 101,4%, жүк тиелімі 103,4%, вагон өнімділігі 108% орындалған. Мұндай көтеріңкі жағдайды жүк вагонының жүрісі, динамикалық және статистикалық жүктеме, вагондардың жүк тиелген құрамға шаққандағы бос жүрістерінің проценті, жұмыс вагонының айналымы, техникалық станцияларда вагондардың тоқтап тұруы, техникалық жылдамдық, локомотив өнімділігі және локомотив жүрісі сияқты пайдалану көрсеткіштерінен де көреміз. Биылғы жоспардың орындалуы өткен жылдың есепті мерзіміндегі межеден де әжептәуір жоғары болып отыр. Бөлімше мамандары жергілікті вагон айналымы, бір жүк операциясы кезінде вагонның тоқтап тұруы және телімдік жылдамдық көрсеткіштерінің жоспардан сәл қалып отырғанын айтады.

– Биылғы жылдың бес айында 16 пайдалану көрсеткішінің 13-і толығымен және асыра орындалды. Әрине, бұл – бөлімше қызметкерлерінің ұйымшылдықпен атқарған жұмысының жемісі. Жергілікті вагон айналымының орындалмауына вагон паркінің шамадан тыс ұсталынуы ықпал етсе, бір жүк операциясының астында вагонның тұрып қалуы жергілікті жүктің уақытылы тасымалданбауына байланысты болды. Ал учаскелік жылдамдық жауын-шашын мен желдің күшеюіне байланысты нашарлады, – дейді үш көрсеткіштің орындалмау себептерін ашып көрсеткен «ҚТЖ-Жүк тасымалы» ЖШС филиалы – Жамбыл ЖТ бөлімшесінің директоры Молдахмет Қожабеков.