Қазақстан мазут экспортын арттырды

Қазақстан Грузия арқылы мазут экспортын 100 есеге арттырды. Теміржол тасымалымен жеткізілген жүк әрі қарай Батуми мен Поти порттары арқылы шет елдерге жөнелтіледі, деп хабарлайды Rail-news.kz.

Биыл алғашқы жарты жылда ресейлік Новороссийск, Таганрог, Азов және Кавказ порттары бағытында қазақстандық мазут экспорты былтырғы 194,7 мың тоннадан биылғы 54,5 мың тоннаға дейін азайды. Мазут отыны енді грузин порттарына қарай бағытталды. Грузияның Батуми және Поти терминалдары қазақстандық өнімнің 43 пайызына дейінгі көлемін тиеуді қамтамасыз етуде.  

Сауда компаниялары экспортқа мазут жөнелтуде аздаған көлік шығындары мен порт ауданындағы іркілістерге қарамастан осы бағытты әрі қарай да жалғастырмақ ниетте. Өнімді Грузия порттары арқылы жаппай жөнелту Батуми терминалы мен Ялама-Самур шекара өткелінің жүктемесін айтарлықтай арттырған, сәуір айының соңында Батуми аумағында 300-400 цистерна жиналып қалған. Әзірбайжан мен Грузияда портқа бағытталған 1 мың вагон тұрып қалған.  

Дегенмен мамыр айының соңында цистерналар кептелісін жоюға мүмкіндік болған. Ал шілде айында Қазақстан мазутының 198 мың тоннасын Батуми және Кулеви порттарына тасымалдау жоспарланған.