Көмір тасымалы бақылауда
Маңғыстау облысы бойынша меншікті тілші
Жылу беру маусымы басталғалы көмірге сұраныс арта түсіп, тасымалдау қарқын ала бастады. Ал оны діттеген жеріне шашау шығармай жеткізу мен тарату бөлек әңгіме.
Жуырда Маңғыстаудағы әскерилендірілген теміржол күзеті мен желілік полиция өкілдері бірлескен іс-шара өткізді. Онда Маңғыстауға келіп жатқан көмір тасымалын бақылап, ұрлық-қарлықтың алдын алу сөз болды. Сай-Өтес станциясында өткен шара барысында бекет үстімен өтіп жатқан «қыстың қымбатты жүгі» тиелген вагондар тексеріліп, оларды тарату логистикасы пысықталды.
– 2022-2023 жылдардағы жылыту маусымының басталуына орай және көмір жүгіне қылмыстық қолсұғушылық әрекеттерінің алдын алуға байланысты осындай профилактикалық жұмыстарды қолға алудамыз. Мақсатымыз – көмір тасымалын назарда ұстап, теміржолға жақын елдімекен тұрғындары мен теміржолшыларға арнайы түсінік жүргізіп, ұрлық-қарлықтың жолын кесу. Маңғыстауда көмір ұрлығы соңғы 4-5 жылдықта мүлде тіркелген емес. Бұрындары қара отын тиелген вагондар тоқтап тұрған кезде Сай-Өтес, Шетпе станцияларында кешкі уақыттарда ұрлайтындар кездесетін. Енді елдімекендердің барлығы газбен қамтылған, оған қажеттілік жоқ. Әрине, көмір тұтыну көлемі азайғанмен, баршылық. Теміржолға, деполарға көмір келіп, қыстың қамы жасалуда. Сол үшін Сай-Өтес станциясынан басталған шараны өзге станцияларда да жалғастырамыз, – дейді Әскерилендірілген теміржол күзетінің Шұғыл әрекет ететін оңтайлы топ бастығының Маңғыстау станциясындағы орынбасары Мәди Үндемесов.