Қазан айында 1 млн тоннадан астам астық тасымалданды
«Қазақстан теміржолшысы» газетінің тілшісі
Қазан айында астық пен ұн тасымалы қарқынды жүзеге асты. Нақты сандарға сүйенсек, «ҚТЖ» ҰК» АҚ желісі бойынша 1,5 млн тонна астық пен ұн тиеліп, оның 1,2 млн тоннасы экспортқа шығарылған.
Тиелген астық көлемі 1 млн тоннадан асып, өткен жылдың есепті кезеңімен салыстырғанда 26% артқан. Шетел асқан әлеуметтік маңызды жүктің көрсеткіші де 41% жоғары болыпты. Ал ұн тиелімі былтырғы балама аймен салыстырғанда 32% өскен. Осы арада қазақстандық ұнға да шетелдіктер тарапынан сұраныстың артқанын байқаймыз. Өсім – 75%.
Теміржолшылар ауыл шаруашылығымен айналысушы шаруа қожалықтарының өнімдерін үздіксіз тасымалдауға атсалысып келеді. Яғни, жүк пойыздарының тұрақты қозғалысы бекітілген бағдардан ауытқымай, уақытылы ұйымдастырылып отыр. Сала мамандарының мәліметінше, қазан айында астық жүктері тиелген 181 маршрут құрылып, жөнелтілген. Оның ішінде 26 маршрут ұн, 155 астық құрамы екен. Ал осы ұйымдастырылған маршруттардың орташа жүру жылдамдығы тәулігіне 670 км құраған.
Теміржолшылар тасымал үдерісі бұзылмай, осы қалыпта жалғасуына мүдделі. Қазіргі таңда ҚТЖ орталық аппаратында астық пен ұн тасымалын үйлестіру және ұйымдастыру жөніндегі штаб тәулік бойы жұмыс істеп отыр. Ал «ҚТЖ-Жүк тасымалы» ЖШС өңірлік филиалдарында вагондардың қозғалысын ұйымдастыру және жөнелтілімдерді бағдарлау мәселелері бойынша жедел астық топтарының тәулік бойы жұмысы ұйымдастырылған. Ең бастысы, жүк тиеп жөнелтушілер мен қабылдап алушылар вагондарды жүк тиеу-түсіру операциясында ұзақ ұстап қалмай, жедел қимылдаса, құба-құп. Ұлттық тасымалдаушы оператор астық мәселесіне қатысты тараптармен келісімде жұмыс істеуде.