Қандыағаш станциясынан он айда 887 мыңнан астам вагон жүк жөнелтілген
Ақтөбе облысы бойынша меншікті тілші
Қазақстан темір жолының еліміздің түкпір-түкпіріне тармақталған желісі теміржол көлігі арқылы жүктердің үлкен көлемін қандай қашықтыққа болсын тасымалдауға мүмкіндік береді.
Сондықтан ірі компаниялардың дені өнімдерін темір жол арқылы тасымалдап отыр. Тоғыз жолдың торабы Қандыағаш станциясының тасымал қызметіне жүгінетін жергілікті 40-тан аса кәсіпорын бар. Станцияда жұмысты ұтымды ұйымдастыру мен қауіпсіздікті қамтамасыз етудің арқасында тасымал көлемі бірте-бірте ұлғайып келеді. Биылғы он айдың ішінде станциядан 887 147 вагон жүк жөнелтілді. 2021 жылмен салыстырғанда тасымал көрсеткіші 101% орындалып отыр. Жүк тасымалдау, қабылдау және тиеу жоспары толық орындалған, сапалық көрсеткіштері де көтеріңкі.
Станцияда 242 теміржолшы еңбек етеді. Тасымал қызметін төрт бағытқа ұйымдастырып отырған Қандыағаш станциясында 10 айда 20584 пойыз кабылданып, 21515 пойыз жөнелтілген. Цемент, болат, қиыршық тас тиеу жұмыстары қыс маусымында да тоқтамайды.
– Аумақта бес паркпен жабдықталған 3 маневрлік аудан бар, 7 маневрлік локомотив жұмыс істейді. Жүк жұмысын ұйымдастырып отырған 11 кірме жол бар. Оның ішінде негізгі екі кірме жолдағы жұмыс тоқтаусыз жүреді. Аудан аумағындағы зауыттардан күніге 7-8 вагон жүк тиелетін жолдар бар. Ең кішкентай деген кірме жолдың өзінде айына 30 вагонға дейін жүк тиеледі. Қазіргі уақытта тәулігіне 80 жұп пойызды қабылдап, 80 пойызды жіберіп отырмыз, – дейді станция басшысы Асхат Мәжитов.