Көмір керуенінде кідіріс жоқ

Президент тапсырмасы бойынша орталық және жергілікті атқарушы органдардың қысқы жылыту маусымына дайындығы жөніндегі қызметін тексеру үшін құрылған арнайы комиссия жер-жердегі жылу орталықтары және қазандықтармен қатар көмір тасымалдау мен қатты отын қорын да назарға алып отыр.

Тексеру, қадағалау шаралары аясында қалалардағы көмір тұйықтарындағы отын қоры да қатаң түрде назарға алынуда. Бұл жұмыстар әлбетте теміржолшылар қауымына сын. Президент Әкімшілігі басшысының бірінші орынбасары Тимур Сүлейменовтің Семейге сапары барысында Абай облысында көмір қорының жеткілікті екендігі нақтыланды. Әйтсе де, Семей ЖТ бөлімшесіне бірқатар міндеттемелер жүктелді. Атап айтсақ, «ҚТЖ-ЖТ» ЖШС «Семей жүк тасымалы» филиалы «Қаражыра» АҚ сұранысына сәйкес облыстың елді мекендеріне көмір жеткізу үшін қажетті вагондармен мерзімінде қамтамасыз етуге міндеттеліп отыр. Сонымен қатар, Қаражыра кен орны облыстың барлық жылу көздерін тиісті сападағы көмірмен қамтамасыз етуі тиіс.  

Биылғы қысқы маусым бойынша облыстың көмірге деген жалпы сұранысы 1,2 млн тоннаны құрайды екен. Бөлімшенің логистика және жүк тасымалы бөлімі мамандарының айтуынша, осыған дейін аймақтағы орталықтандырылған жылу көздеріне – 595,4 мың тонна, жеке сектордағы халыққа – 564 мың тонна, ал бюджеттік ұйымдарға – 83,1 мың тонна қатты отын қажет болған. Бүгінде оның 727,9 мың тоннасы жеткізіліпті. Дегенмен өңірдегі ауа температурасының төмен болуына орай тұрғындардан сұраныс азаймай отыр.  

– Қазіргі таңда коммуналдық-тұрмыстық секторды көмірмен қамту бойынша аймақта он теміржол тұйығы жұмыс істеп тұр. Әр тәулік сайын облыс көлеміндегі әрбір теміржол тұйығына орта есеппен алғанда 30 вагон немесе 2 мың тонна көмір жеткізіледі. Бір ғана Семей қаласының өзінде 8,6 мың тонна көмір бар, вагон тапшылығы жоқ. Қаражыра көмір кенішінде тосын жайттар орын алмаса, көмір жеткізуде де кідіріс болмайды. Дегелең станциясы бойынша негізгі күш көмір тиеуге жұмылдырылуда. Тораптық станцияларда да көмір тиелген керуендер легінде кідіріс жоқ, іркіліссіз жіберілуде. Қазіргі таңда бөлімше бойынша қатты отын тасымалы штаттық режимде жүргізілуде, – дейді бұл орайда бөлімшенің логистика және жүк тасымалы бөлімінің аға инженері Айтолқын Мұхамедиярова.  

Бұл ретте бірінші класты Дегелең станциясындағы техникалық процестерге баса назар аударылуда. Сол тәрізді вагондарды жинап алу мен сұрыптау ісінде елеулі түрде басымдық берілетін Жаңа-Семей жүк станциясындағы жұмыстар да бөлімше басшысының назарына алынған. Жалпы, Қаражыра кенішінен бастап, теміржол бойындағы көмір тасымалдау ісі республикалық комиссияның жіті қадағалауында.