Көкшетаудан Түркияға жасымық тиелген жүк пойызы аттанды
«Қазақстан теміржолшысы» газетінің тілшісі
Қазақстанда өндірілетін жасымықтың кезекті партиясы түрік еліне жол тартты. Көкшетау-1 станциясынан Түркияның Мерсин станциясына 20 футтық 20 контейнер жасымық тиелген жүк пойызы жөнелтілді.
Отандық ауыл шаруашылығы өнімдерін экспорттық жөнелтуді «KTZ Express» АҚ еншілес кәсіпорны – «Xinjiang KTZ International Logistics Co.Ltd» ЖШҚ ұйымдастырды. Солтүстік Қазақстан облысынан қызыл жасымық Түркияның оңтүстігіне теміржол және теңіз көлігі тартылған орта дәліз арқылы өтеді.
Қазақстанда жасымық әзірге бірінші қажеттіліктегі өнім емес, бірақ оған деген қызығушылық артып келеді. Әлемдегі №1 жасымық экспорттаушы бүгінде Канада болып табылады. Түркия әдетте жасымықты Еуропаға немесе басқа елдерге сатады, ал Қазақстаннан ішкі нарық үшін арзан жасымық сатып алады.
Қазір жасымық нарығының барлық ойыншылары бағаның мүмкіндігінше тұрақтануын күтуде. Қазақстанда да жақсы егін жиналады, бірақ пайдаланушылар көп емес. Керісінше, жасымық тұтыну пайызы өте жоғары елдер бар.
Егер Қазақстан 100 мың тонна жасымық өсірсе, кем дегенде 80 мың тоннасын экспортқа жібереді. Ел ішінде тұтыну үшін 5-6 мың тонна жеткілікті. Жасымық барлық жерде қолданылмайды. Дәстүрлі түрде оны көп тұтынатын – араб елдері мен Үндістан.
«Өндіріс көлемі өскеннен кейін баға бірден төмендейді. Егін жинау маусымының басында Қазақстанда бір тонна қызыл жасымыққа 280 мың теңгеден берілді, содан кейін баға төмендеді, – дейді Memisoglu түрік компаниясының өкілі Ерзат Оспанов.