Өткен жылы Атырауда жұмыс вагондарының айналымы 93,8% құраған

Атырау жүк тасымалы бөлімшесі бойынша өткен жылы пайдаланым жүк айналымы жоспардан төмен болып, негізгі 16 көрсеткіштің бесеуі ғана орындалды. Әрине, жоспар бойынша кейбір көрсеткіштердің межеден төмен болуының өз себептері де бар.

Ең алдымен оған орташа жүк тиеудің және тиелген жүк вагондарының кемуі, транзиттік тасымалдың азаюы себеп болды. Қаңтар қасіреті кезінде, яғни 2-6 қаңтар аралығында елде төтенше жағдайдың жариялануына байланысты өңірде ешқандай мұнай өнімдері тиелмеген, ешқандай жүк тасымалы жүргізілмеген. Ал одан кейін Украинадағы соғысқа байланысты онда жөнелтілетін экспорттық мұнай өнімдерінің де тұрып қалуына әкелді.  

Бөлімшенің өндірістік-техникалық бөлім инженері Н.Матаеваның мәліметінше, 2022 жылғы 1 наурыздан бері Украинаға қандай да бір жүк жөнелтуге және Солтүстік Кавказ темір жолына пропан-бутан өнімін жіберуге тоқтам қою да тасымал көлемінің кеміп кетуіне әсер еткен. Сондай-ақ, «Теңізшевройл», «Батыс Транс Групп», «Индер Туз Компания», «Тенгизская Транспортная Компания» ЖШС-мен Мақат, Құлсары, Теңдік, Қарабатан станциялары арқылы экспорттық бағыттағы пропан, бутан, мазут, кокс, күкірт тиелген вагондар келісілмегендіктен және тапсырыс берушілердің бас тартуы себепті тиелмей қалды. Өңірдегі мұнай өнімдерін өндіріп, өңдеуші «Теңізшевройл», Атырау мұнай өңдеу және Болашақ зауыттарының жыл барысында бірнеше рет жөндеуге тұруы да тасымал көлеміне әсер етті.

Ресей-Украина арасындағы қақтығыс еларалық экономикалық қарым-қатынасқа да ықпалын тигізді. Соның әсерінен экономиканың негізгі бөлігін құрайтын өңірдегі мұнай өнімдерін өндіру, оны тасымалдау көлемі кеміп кетті. Оған нарықтағы ауқымды дағдарыс, мұнай бағасының тұрақсыздығы, өнімнің болмауы және сатып алушылардың төлемқабілетсіздігі де себеп болғаны анық.  

Көрсеткіштерді жіктер болсақ, жергілікті вагон айналымы 100%, вагонның орташа статистикалық салмағы 100,5%, динамикалық салмағы 100,5, пойыздың орташа салмағы 100,1, жүк вагондарының жүрісі 100,2% орындалды. Аймақтағы негізгі өндіріс ошақтарының қызметі мұнай өндірісімен байланысты болғандықтан, пойызбен тасымалданатын жүк түрлері де негізінен мұнай өнімдері. Соған сәйкес, кіріс те тасымал көлеміне байланысты болады. Бір жылға белгіленген пайдаланым жүк айналымының жоспары 10873 млнткмнетто болса, орындалғаны 10656,1 млнткмнетто, яғни 98 пайыз. Ал директорлар кеңесі жоспарына сәйкес 95,2%.  

Сондай-ақ, өткен жылы жұмыс вагондарының айналымы 93,8% құраған. Себебі вагон тиеуді игермеу, тиелген вагондарды қабылдаудың кемуі, автобұғаттаудың тоқтауы және жылдамдықты шектеуге ескерту берілуі де вагон айналымына әсер еткен. Ол «ТШО» ЖШС, «Механизированная колонна», «Иси Гипс Индер», «Нура», «Еврострой», «Агропромтехника», «Градекс», «Бертас 2», «Кедентранссервис», «Петро ретэйл», «Атыраубетон-24», «Батыс Альянс» ЖШС-мен Құлсары, Мақат, Махамбет, Атырау, Ақжайық станцияларында уақытында түсірілмегендіктен кеміді. Оған алдымен жүк қабылдаушылардың өздері де кінәлі, яғни кірме жолдардың алыстығы, локомотивтерін күту, түсіру орнының бос болмауы, жүктің қатып қалуы, жұмыс күшінің болмауы, бір уақытта бірнеше пойыздың қатар келуі, т.б. себептер көп. Ал жылдамдықтың кемуіне Атырау-Қиғаш. Мақат-Сағыз, Мақат-Құлсары бағыттарында күрделі жөндеу жұмыстар жасалып, 3840,9 сағатқа 1035 технологиялық «толаскез» алудың да әсері болды. Ескі бұрмаларды жаңарту, электр желілері, ВЛ-СЦБ құралдарын жөндеу үшін автобұғаттау, сондай-ақ ДУОМАТ, УНИМАТ, Жейсмар жол машиналарымен жол жұмыстарын жүргізу үшін де 1820,21 сағатқа 561 технологиялық толаскез алынған.