Атыраулық теміржолшылар жаңа технологияларды кеңінен қолдана бастады

Атырау өңірінде белгі беру-байланыс саласындағы соны жетістіктер аз емес. Теміржолшылар бірте-бірте ескіні қолданыстан шығарып, жаңа технологияға иек артуда.

Солардың қатарына контейнерлік типтегі жаңартылған модульді техникалық құралдар кешенін жатқызуға болады. Құлсары және Атырау белгі беру және байланыс дистанцияларында Мақат – Құлсары учаскесі бойынша Бек-Бике разъезінде, Құлсары – Бейнеу учаскесінде Қоркөл станциясында, Атырау – Ақсарай учаскесі бойынша Тұманды мен Д.Нұрпейсова бекеттерінде осындай 7 дана контейнерлік типтегі кешен орнатылған. Ал осы жылдың 3-ші тоқсанында Атырау дистанциясында Атырау-Қиғаш телімінің Аққыстау, Исатай, Афанасьево бекеттеріне пойыз қозғалысы кезінде жылжымалы құрамның техникалық жағдайын автоматты түрде бақылауға арналған 6 дана жаңартылған контейнерлік техникалық жабдықтар кешенінің жүріс модульдері орнатылды.  

Өңірде электрондық құжат айналымы (ЭҚА) – қағазсыз жұмыс процесі тұжырымдамасын іске асыратын электрондық құжаттарды өңдеудің автоматтандырылған процестері жүйесі де іске қосылған. Бұл – электронды құжаттармен жұмыс жасауды, сондай-ақ қызметкерлер арасындағы өзара іс-қимылды тиімді ұйымдастыруға мүмкіндік беретін компьютерлік бағдарлама. Жүйені пайдалану құжаттармен жұмыс істеуде әдеттегі операцияларға жұмсалатын уақытты едәуір қысқартады. Сондай-ақ, барлық аймақ бойынша DX-500 арқылы телефон байланысы орнатылған. Ол арқылы халықаралық сөйлесулер коммутатордың қосуынсыз немесе «8» байланыс нөмірінсіз мүмкін болды, яғни сөйлесулер жедел әрі тегін.  

Маңғыстау-Бейнеу-Оазис-Мақат-Атырау-Ақсарай учаскелерінде ұзындығы 1196 шақырымды құрайтын диспетчерлік орталықтандыру қондырғысы түбегейлі жаңартылды. Мұнда байланыс бұрынғыдан әлдеқайда артып, еңбек үдерісі жақсарған.