Raisekom сандық технологиясы қолданысқа енгізілгелі байланыс сапасы артты

Қызылорда магистральдық желі бөлімшесіне қарасты Қызылорда белгі беру және байланыс дистанциясында жоғары жиіліктегі Raisekom (Роиском) заманауи байланыс құрылғысы аймақта алғаш рет қолданысқа енгізілген.

Роиском талшықты-оптикалық сандық байланыс жүйесі болашақта бүгінгі қолданыстағы әуе желілік, К-60П және магистральдық байланыс жүйелерін заман талабына сай алмастыруы мүмкін. Заманауи байланыс құрылғысының жұмысымен таныстырған дистанцияның инженерлері Нұрлан Аймахан, Нұрлан Жүсіпбаев және аға электромеханик Жарқынбек Әділбеков сандық технологияның Арыс – Қызылорда және Қызылорда – Ақтөбе станциялары арасындағы байланыс желілерінің дәл, анық, жылдам әрі сапалы сигнал тарату үшін қолданысқа енгізілгенін жеткізді.

Және де секундына 2 мегабит жылдамдықта жұмыс жасап тұрған Роиском сандық байланыс жүйесі қай жағынан да болсын артықшылығын дәлелдеген. Цифрлы технология емес пе?! Сапалы, үнемді, икемді, жарамды заманауи құрылғының алдағы уақытта қолданыс аясын кеңейту күтілуде екен.  

– Роиском сандық технологиясы қолданысқа енгізілгелі байланыс желілерінің сапасы мен жылдамдығы анағұрлым артты. Заманауи құрылғы болғанымен осыған дейін қолданыста болған құрылғылар негізінде жұмыс жасағандықтан біздің мамандар тез игерді. Әрине, мамандарымыз арнайы оқу курсынан өтіп, тәжірибелерін шыңдады, – деді дистанцияның аға электромеханигі және ауысым басшысы Жарқынбек Әділбеков.

Талшықты-оптикалық, жоғары жиілікті, заманауи сандық технологияның «тілін тауып», бүгінде өзгелерді оқытып та жатқан мамандар қатарында дистанцияның кезекші механиктері Айнұр Елеуова, Сәбира Алдаберген және Жұмагүл Әбдіреева бар екен. Жаңа технологияның технологиялық талаптарға сай жұмыс жасауы үшін қажетті байланыс тетіктері іске қосылған. Өнім Қытайда өндірілгенмен, оны өткен жылдың соңында монтаждап іске қосу жұмыстарын жергілікті мамандар жүргізген.