Цифрлық технология: Қозғалысты басқару әлдеқайда жеңілдеді
Ақтөбе облысы бойынша меншікті тілші
Тамыздың 22-23 күндері Ақтөбеде өңірлік пойыздар қозғалысын басқару орталықтарының жұмысы мен олардың өзара байланысын ұйымдастыру және цифрлық трансформация мүмкіндіктерін арттыру тақырыбына арналған жиын өтті.
Екі күндік көшпелі жиынға «ҚТЖ» ҰК» АҚ және «ҚТЖ-Жүк тасымалы» ЖШС-нің басшылық құрамы мен барлық аймақтағы өңірлік орталық өкілдері қатысты. Арнайы бағдарлама бойынша өткен шарада осы жылдың жеті айы бойынша ӨПҚБО (РЦУП) пайдалану жұмысының есебі талқылданып, ұсыныс-пікірлер тыңдалды. Заманауи талапты жетілдіру мен дамыту, бизнес-процестердің тиімділігі сөз болды. Локомотивтерді ұтымды пайдалану мен бос тұруын болдырмау мәселесі жеке қарастырылды.
Халықаралық тасымалдағы жүк пойыздарын қалыптастыру жоспары таныстырылып, 2023-2024 жылдарға арналған вагон ағындары, магистральдық желі тиімділігін арттыру және 2023-2024 жылдарға арналған жүк пойыздарын қалыптастыру жоспары талқыланды.
Ресми кездесуден кейін жиналғандар Ақтөбе, Атырау, Батыс Қазақстан, Маңғыстау және Қызылорда облыстарындағы пойыздар қозғалысын басқаруды ұйымдастырып отырған Орталық жұмысымен танысып, диспетчерлермен тілдесіп, ситуациялық жағдайларды талқыға салды.
«Пойыздар қозғалысын бір орталықтан басқару аймақтар үшін өте тиімді. Қозғалысты басқару әлдеқайда жеңілдеді. Автоматтандыру, сандық технология үрдіс алып, ақпараттық заманға кіргеніміз сезілді», – деген диспетчерлер өңірлік пойыздар қозғалысын басқару жобасының қай жағынан болса да пайдалы болғанын тілге тиек етті.
Расымен, бүгінде Пойыздар қозғалысын басқару орталығындағы диагностикалық кешен, ІТ-жүйе ішкі тасымалдау процесін қағазсыз жүргізу заманауи талапқа сай жұмыс істеуге толықтай мүмкіндік беріп отыр.
«Кездесу өте ауқымды да мазмұнды, жоғары деңгейде өтті. ҚТЖ-дан тиісті басшылар арнайы келіп қатысты. Алматы мен Астанадағы пойыздар қозғалысын басқару орталықтарының басшылары келді. Мұндай басқосу барлық жағынан тиімділікті арттыра түсуге септігін тигізбек», – деді Ақтөбедегі «Пойыздар қозғалысын басқару» орталығы бастығының орынбасары Мағауия Амантайұлы.
Айта кетейік, Ақтөбедегі «Пойыздар қозғалысын басқару» орталығы 2020 жылдың қазан айынан бері жұмыс істейді. Бүгінгі таңда мұнда 23 пойыз учаскесі бар, оның жетеуі біріктірілген. Батыс өңірінің жалпы ұзындығы 5 031 шақырымды құрайды.