Пойыздарды интернетпен қамтамасыз ету жұмыстары жалғасуда
«Қазақстан теміржолшысы» газетінің тілшісі
«Жолаушы тасымалы» АҚ үшін цифрландырудың негізгі бағыттарының бірі жол үстінде пойыздарда жоғары жылдамдықты интернетке қолжетімділікті қамтамасыз ету болып отыр.
Айталық, биылғы жылдың басынан бастап «ҚТЖ» ҰК» АҚ OneWeb төмен орбиталық спутниктік желісінің ресми дистрибьюторымен бірлесіп, Қазақстанда Астана – Алматы және Астана – Өскемен қатынасындағы жолаушылар пойыздарында интернетке қолжетімділікті қамтамасыз ету бойынша пилоттық жобаны іске қосты. Сондай-ақ ағымдағы жылдың тамыз айында Астана – Бурабай электр пойызында Starlink технологиясы негізінде интернет пилоттық режимде іске қосылды.
Пилоттық жобаның алдын ала қорытындылары жолаушылар пойыздарында спутниктік Интернет технологиясын қолданудың жоғары тиімділігін және жолаушылар тарапынан үлкен сұранысты көрсетті. Жүргізілген сауалнамаларға сәйкес, жолаушылардың 87%-ы интернеттің сапасына риза болып, қызмет олардың күткен талабынан шыққанын растаған. 150 Мбит/с дейінгі жоғары жылдамдықты интернет жолаушыларға пойыздың барлық жолында байланыста болу мүмкіндігін беріп отыр. Атап айтқанда, пойыздың онлайн мониторингі сервистері, жол үстінде қолма-қол ақшасыз, яғни ұялы телефон арқылы төлеу және ойын-сауық контентін шектеусіз таңдау мүмкіндігі қолжетімді. Алдағы жылы жобаны негізгі бағыттарға көбейту жоспарлануда.