Сингапурлық технология Қазақстан логистикасын қалай өзгертті?

Қазақстан өткен жылы жүк транзитіне арналған цифрлық жүйені енгізу арқылы шамамен 2 млн АҚШ долларын үнемдеді. Бұған кеден мен теміржол қызметтеріне деректерді электронды алмасуға мүмкіндік беріп, транзиттік құжаттарды автоматты түрде рәсімдейтін платформа себеп болған.

Соның нәтижесінде делдалдық және логистикалық шығындар азайып, жүк өткізу уақыты айтарлықтай қысқарды. Жоба Сингапурдың жетекші цифрлық компанияларының бірімен жүзеге асырылып отыр. Екі елдің бірлескен бастамалары мұнымен шектелмейді. Былтыр қос мемлекет бірқатар ірі инвестициялық жобаны іске қосты. Цифрлық платформа Қазақстанда екі жыл бұрын іске қосылған.  

Осы уақыт ішінде жүйе шығындарды азайтып, кедендік рәсімдерді айтарлықтай жеделдетті. Бұған дейін транзиттік құжаттарды рәсімдеу 12 сағатқа дейін созылса, қазір бұл үдеріс небәрі 30 минутта жүзеге асады. Жоба Қытайдан Орталық Азия мен Еуропаға бағытталған негізгі транзиттік бағыттарды қамтиды. Платформа іске қосылғалы бері 200 мыңға жуық операция орындалды.  

Алдағы екі жылда платформаның ауқымын кеңейтіп, жүйелердің өзара жұмысын күшейту көзделіп отыр. Қытайдан Қазақстан арқылы өтетін негізгі дәліздердегі тасымал көлемін арттыру жоспарланған. Бұл транзит ағынын еселеп көбейтуге мүмкіндік береді. Сонымен бірге «теңіз – теміржол» бағыты да дамитын болады. Жобаға үлкен үміт артылуда.  

Қазақстанның Сингапур, Аустралия және Жаңа Зеландиядағы Төтенше және өкілетті елшісі Асқар Құттықадамның айтуынша, қазір елімізде Сингапур капиталының қатысуымен 300-ге жуық бірлескен кәсіпорын бар. Олардың басым бөлігі логистика, өнеркәсіп және құрылыс салаларында жұмыс істейді, сондай-ақ қаржы мен цифрлық технологиялар секторын қамтиды.