«Цифрлық трансформация» бағдарламасы аясында Қытаймен арадағы шекарада тиімді шаруалар қолға алынды
«Қазақстан теміржолшысы» газетінің тілшісі
«Кедентранссервис» АҚ терминалдары қызметінің тиімділігін арттыру жобасы үстіміздегі жылдың ақпан айында «ҚТЖ» ҰК» АҚ Директорлар кеңесінің хаттамасымен «Қазақстан темір жолы» ұлттық компаниясында жүзеге асырылып жатқан «Цифрлық трансформация» бағдарламасының жобалар қоржынына енгізілген болатын. 2021-2023 жылдар аралығында жүзеге асқалы отырған бұл жобаның мақсаты – терминалдың операциялық қызметін басқарудың автоматтандырылған жүйесін енгізу, сонымен қатар онлайн сервистерде клиенттермен өзара іс-қимыл және коммерциялық функциялар процестерінің тиімді моделін құру. Жобаны іске асыру шеңберінде енгізілетін өзгерістер негізгі процестерді оңтайландыруға және автоматтандыруға мүмкіндік береді. Компания басшысы Арман Сұлтановтың айтуынша, бұл терминалдардың өнімділігі мен тиімділігін арттырып, сонымен қатар қызметтен түсетін кірістің өсуін қамтамасыз етеді. Жақында «ҚТЖ» ҰК»АҚ Басқарма төрағасының инфрақұрылым жөніндегі орынбасары – «Магистральдық желі дирекциясы» филиалының директоры Бауыржан Орынбасаровтың жетекшілігімен Алматы қаласында жаңғыртуды жүзеге асыратын жобалау ұйымы басшылығы мен мемлекетаралық шекаралық Достық станциясында қайта тиеуді қамтамасыз ететін компаниялар өкілдері қатысқан кеңес өтіп, онда Достық станциясының қайта өңдеу қабілеті мен қайта тиеу қуаттарын дамытудың бірыңғау тұжырымдамасын айқындау мәселелері ортаға салынған болатын. Сонымен қатар қатысушыларға вагондарды қабылдау көлемін ұлғайту мақсатында қайта жаңарту жөніндегі жаңа жобалар мен жоспарлар таныстырылғанды. «Кедентранссервис» АҚ басшылығы қатысушыларды Қытай елінен келетін контейнерлік құрамдардың қайта тиелуін ұлғайтуға мүмкіндік беретін, қазіргі сәтте осы көліктік-логистикалық қызметтер нарығында бар жаңа технологияларды қолдана отырып, контейнер алаңын қайта жаңарту бойынша жобалау-сметалық құжаттаманың әзірлемесі жүріп жатқаны туралы хабардар етті. Транзиттік тасымалдаудың жыл сайын өсуін қамтамасыз ету үшін инфрақұрылымды дайындау жұмыстарының дер кезінде қолға алынғанын кеңеске қатысушылар да мақұлдады. Атап өтерлігі, «Кедентранссервис» АҚ қазірдің өзінде ҚР арқылы транзиттік тасымалдардың жыл сайынғы өсуін ескере отырып, келешектегі қажеттіліктерді қанағаттандыру үшін ҚХР-мен шекарада инфрақұрылымды дайындау бойынша жұмысты озық қарқынмен жүргізуде.