ҚТЖ темір жолдар желісінде жөндеудің барлық түрлерімен 550 км жол жаңартылды
«Қазақстан темір жолшысы» газетінің тілшісі
Жаз маусымы – теміржолда тек жолаушы тасымалы жанданатын маусым ғана емес, жол жаңарту жұмыстарының да қарқын алатын кезі. Ағымдағы жылдың алғашқы жартыжылдығында «ҚТЖ» ҰК» АҚ темір жолдар желісінде жөндеудің барлық түрлерімен 545,462 км жол жаңартылды.
Биыл ел теміржолдарының 550,6 шақырымына күрделі жөндеу жоспарланған. Қазіргі таңда бұл көлемнің 63% немесе 350 км жуығы күрделі жөндеуден өткен. Қалғаны – күшейтілген және орташа, көтерме жөндеу сынды жол табанын сауықтыру жұмыстары. Күрделі жөндеудей болмағанымен, жөндеудің басқа түрлері де жол күтімін жақсартып, қозғалыс қауіпсіздігін қамтамасыз етуде ролі маңызды.
Күрделі жөндеу жұмысының 318,9 шақырымы осы салаға маманданған «Integra Construction KZ» және «Теміржол жөндеу» жауапкершілігі шектеулі серіктестіктерінің қатысуымен атқарылды. Ал Ағадыр машиналандырылған жол дистанциясының күшімен 30,5 км жол күрделі жөндеуден өтіп, жаңа келбетке ие болды.
– Бұдан бөлек, үстіміздегі жылы шаруашылық тәсілмен 70 км жолға күшейтілген орта жөндеу жұмысы жүргізілуі тиіс болатын. Бүгінде бұл жұмыс көлемінің 88% орындалды. Сонымен қатар 23 км жолда жаңа материалдармен тұтастай рельс тіреуіші алмастырылса, биылға межеленген қалған 52 км жолда алдағы айларда жүргізілмек. Сондай-ақ, биыл 164,470 км жолда тұтастай рельс табанын алмастыру межеленіп отыр. Қазір бұл жұмыстың 68% немесе 111,4 км орындалған. Жөндеу жұмыстарының басым бөлігі Қарағанды, Жамбыл магистральдық желі бөлімшелеріне қарасты телімдерде жоспарланған. Жалпы, 2022 жылға арналған жол жұмыстарының барлығы Компанияның өндірістік бағдарламасы шеңберінде атқарылып жатқанын айтар едік, – дейді Жол және құрылыстар департаменті директорының күрделі құрылыс жөніндегі орынбасары Нұрсұлтан Танабаев.
Жалпы жылдың соңына дейін 1034 км магистраль желісін жаңғырту көзделіп отыр. Ұлттық компанияда теміржол инфрақұрылымын күтіп ұстауға айрықша назар бөлінуде. Өйткені, жол табанын жоспарлы түрде жаңғырту жұмыстарының нәтижесінде ғана қозғалыс қауіпсіздігі қамтамасыз етіліп, жолаушы және жүк пойыздарының жылдамдығы артатыны белгілі.
