Таулы өңірде 900 метр жол жөнделді

Инфрақұрылым
29.02.2024, 12:23
Суретті түсірген автор
Нұрлыбек Досыбай

Түркістан облысы бойынша меншікті тілші

Түркістан облысында 900 метр темір жол төсемі бас-аяғы 18 сағат ішінде күрделі жөндеуден өтті. Шымкент пен Түлкібас аралығындағы темір жол телімінің 3 360-шақырымында тозығы жеткен ағаш шпалдар алынып, орнына темірбетонды рельс торкөздері салынды.

Түлкібас өңіріндегі Алатау сілемдерінің тау бөктерінде тартылған темір жол телімінің 3 360 шақырымы Жаскешу ауылының маңына тұспа-тұс келеді. Топографиялық картада бұл жерлер Қарақұс шыңы деп көрсетілген. Басын ақ қар басқан шыңның биіктігі 1 342 метр. Ал бауырын бойлай кесекөлденең салынған теміржол тармақтары теңіз деңгейінен 684 метр биіктікте орналасқан. Өткен апта осы аталған координаттар түйіскен нүктедегі маңызы жоғары стратегиялық нысанда ауқымды жұмыстар атқарылды.

Ақпан айында облыс аумағында «Қазақстан темір жолы» ҰК» АҚ-ға қарасты бірнеше мекеме, кәсіпорын жетекшілері мен жүздеген теміржолшылар атсалысқан жоба аясында қысқа мерзім ішінде 1 900 метр шойын жолға күрделі жөндеу жұмыстары жүргізілді. Оны Ағадыр машиналандырылған жол дистанциясы мен Шымкент магистральдық желі бөлімшесіне қарасты Шымкент жол дистанциясының ұжымы іске асырды.

– Жалпы біз жуырда ғана жоспарлы толаскезде 1 шақырым жолға дер кезінде күрделі жөндеу жүргізгенбіз. Ал оған Жаскешу ауылының маңындағы 900 метрді қоссақ, бас-аяғы 1,9 шақырым жолды толық жөндеуден өткіздік. Бұл айтуға жеңіл, ал шын мәнінде күрделі жұмыс. Бірақ мамандарымыз өздеріне жүктелген тапсырманы тиянақты атқарып, сенім үдесінен табыла білді, – дейді Шымкент магистральдық желі бөлімшесі директорының орынбасары Жомарт Мырзабеков.

Оның айтуынша, мұндай жұмыстарды жүзеге асыруға дайындық жұмыстары бір ай бұрын, тіпті қажеттілік болған кезде 45 күн бұрын жан-жаққа арнайы хабарламалар жіберу арқылы ұйымдастырылады. Бұл жылжымалы құрамдардың кестесі мен қозғалыс қауіпсіздігін қатаң сақтай отырып, сапалы қызмет көрсетудің бұлжымас қағидасы.

Ал еңбек көрігі қызған телімде 200-ге жуық жұмысшы «бір атаның баласындай» әрекет етіп, жұмысқа 20-ға жуық түрлі техника жұмылдырылғанын айтып отыр Ағадыр машиналандырылған жол дистанциясының Қарағанды колоннасы бойынша директор орынбасары Мұсатай Жұманов. Тапсырма талапқа сай орындалған.  

«Өзімізбен бірге ала келген техникалардың қатарында МПД кранының бірі – тозығы жеткен шпал мен рельсті тұтасымен алып, жинап жатса, енді бірі темірбетонды рельс торкөздерін төсеп жатты. Әрине, оның арасында автогрейдер қиыршық тасты тегістеп, тағы бір техника нығыздап жатады. Сонымен қатар әрбір жұмысшының өзіне тән бекітілген міндетін мінсіз орындауының нәтижесінде жоспарымыз ойдағыдай іске асты», – дейді ол.

Мамандардың айтуынша, учаскеде 1 электробаластер мен жол жиегіндегі қиыршық тастарды тегістеп, нығыздайтын арнайы техниканың 3 данасы, 2 дана бульдозер мен бірнеше шаруашылық машинасы жұмылдырылған.  

Әрине, мұның сыртында кәсіби түрде машықтанған адам араласпаса, іс өнбейтіні белгілі. Сондықтан да орайлы сәтте тәжірибесі толысып, біліктілігі жоғары жолшылардың ерен еңбегін атап өткен ләзім. Ал жол шеберлерінің легін дайындап, қалыптастыруда Шымкент жол дистанциясы ұжымының Ұлттық компанияға қосып жатқан үлесі ұшан-теңіз.

Бүгінде жас та болса бас болған Дәурен Даниярұлы жетекшілік ететін ПЧ-53 мекемесінде 369 адам жұмыс істесе, оның 245-і жол шебері санатында.  

«Біздің ұжым Түлкібас пен Арыс арасындағы 3 378-ден 3 214-ші шақырым аралығында жалпы ұзындығы – 164 шақырым жолды күтіп, баптаумен айналысады. 19 ақпан күнгі 18 сағаттық толаскезге дайындықты тастүйін жүргізудің нәтижесінде, Ағадырдан келген негізгі техникалар мен командаға өз тарапымыздан қосымша көмек ұсындық. Өзара бірлесіп, үндесе еңбек ету арқылы көздеген мақсатымызға жете алдық», – дейді жол дистанциясының басшысы.

Жаңалықтар
21.06.2024
ҚТЖ-да мүмкіндігі шектеулі адамдар да жұмысқа шақырылды
Жүк тасымалы
21.06.2024
Контейнер тасымалы: келешекте көкжиегі кеңейеді
Жаңалықтар
21.06.2024
Санитарлық талаптар сақталуы тиіс
Жүк тасымалы
21.06.2024
ТХКБ-ны дамыту келісімі ратификацияланды
Жүк тасымалы
21.06.2024
Ақтау порты логистикалық торапқа айналады
Жаңалықтар
21.06.2024
ҚТЖ арнайы киім мен ЖҚҚ есебін автоматтандырады
Жаңалықтар / Мұрағат
21.06.2024
«Қазақстан теміржолшысы» газеті, №52 21 маусым 2024 жыл
Жаңалықтар
20.06.2024
Астана вокзалында ерекше көрме өтіп жатыр
Аймақтар
20.06.2024
Семейде қалаішілік жаңа желінің құрылысы басталды
Әлемде
20.06.2024
Hyundai Rotem Өзбекстанға алты жүрдек пойыз жеткізеді
Қауіпсіздік
20.06.2024
Түркістан түлеп келеді, ал өткелдің жайы өзекті
Қауіпсіздік
19.06.2024
Өндірісте еңбек қауіпсіздігін сақтау маңызды
Темір жол тарихы
19.06.2024
Теміржол тарихы: Әулиеатаға теміржол қалай келді?
Спорт
19.06.2024
Атырауда теміржолшылардың жазғы спорт алаңы ашылды (Фото)
Жаңалықтар
19.06.2024
ҚТЖ-да "Үздіктер алаңы" корпоративтік даму бағдарламасы басталды
Әлеумет
19.06.2024
Ақмолалық дәрігер жүрдек пойызда толғағы қысқан әйелді босандырды
Әлемде
19.06.2024
Euro-2024 жанкүйерлері үшін Германия жаңа жүрдек пойызды іске қосты
Әлемде
18.06.2024
Мамырда Қытай-Еуропа бағытындағы жүк пойыздар рекордтық көрсеткішке жетті
Инфрақұрылым
18.06.2024
Шымкенттің вокзалы жаңа келбетке ие болды
Жолаушылар тасымалы
18.06.2024
Елдің батысына су жаңа вагонмен қамтылған пойыздар жүре бастады