Шу – Отар учаскесінде күрделі жөндеу жүргізілді

«ҚТЖ» ҰК» АҚ «Жамбыл магистральдық желі бөлімшесі» филиалының бекітілген жоспарына сәйкес Шоқпар дистанциясының Шу – Отар учаскесі бойынша рельсті-шпал торы ауыстырыла отырып, күрделі жөндеу жұмыстары жүргізілді.

Теміржол сапасын жақсарту мақсатында жүргізілген күрделі жөндеу жұмыстары кезінде құрылысқа SMD-80 ауыр типті машиналары қолданылды. Рельс тіректері шаруашылық тәсілімен ауыстырылып, жаңа темірбетонды шпалдар төселді. Темірбетонды шпалдар төселген жолдың ұзындығы 5 шақырымды құрайды. Сондай-ақ 12 жаңа бағыттамалық бұрма салынды.  

Күрделі жөндеу жұмыстары кезінде 3 бағыттамалық бұрма қайта төселді. Құрылысқа пайдаланылған рельс, шпал, темір өнімдерінің бәрі – қазақстандық өнім.

– Жамбыл магистральдық желі бөлімшесі директорының бірінші орынбасары Дәулетбек Жолдасбаевтың басшылығымен Шоқпар жол дистанциясының қызметкерлері жол машиналарының көмегіне жүгіне отырып, жөндеу жұмыстарын жүргізді. Орташа толаскез уақыты шамамен 6 сағаттан 36 сағатқа дейін созылды. Жалпы дистанция бойынша күрделі жұмыстарға шамамен 140 жұмысшы жұмылдырылған. Сондай-ақ құрылыс жұмыстарына Шу және Ақадыр машиналандырылған жол дистанцияларының жұмысшылары да атсалысты. Жөндеу жұмыстары пойыздардың қозғалыс кестесінің бұзылуына кедергі болған жоқ, – дейді Шоқпар жол дистанциясының бастығы Ахан Нартбаев.  

Құрылыс жұмыстарына тартылған жолшылар, жалпы теміржолшылардың демалыс кезінде ішінде барлық қолайлы жағдайлар қарастырылған жаңа модульдік ғимараттарды пайдаланады. Негізі демалыс орындары Шоқпар жол дистанциясы бойынша толықтай қамтамасыз етілгенін айта кету керек. Жаңа модульдік ғимараттар қазіргі уақытта Шоқпар, Кемер, Көктөбе, Бел, Қордай станцияларында орнатылған. Модульдерде теміржолшыға қажетті барлық жабдықтар бар. Оның ішінде 10 адамға жатын орын қамтамасыз етілген. Асханаға қажетті тоңазытқыш, микротолқынды пеш, тағы сол сияқты керек жабдықтардың бәрі қойылған. Теміржолшылар қазіргідей аптап ыстық кезде модульдік үйде санитарлық тораптардың орнатылғанына қуанады. Душ кабиналарында суық су, ыстық су үзілмейді.  

Жалпы Шоқпар дистанциясы бастығының айтуынша, 2025 жылға 5 модульдік ғимарат қою жоспарланған. Межелі жұмыс орындалса, келесі жылы дистанцияның барлық жұмысшылары толық санитарлық жағдайлармен қамтамасыз етіледі. Аталған учаске бойынша жүргізілген жөндеу жұмыстарының нәтижесінде пойыздар қозғалысының қауіпсіздігі қамтамасыз етіледі. Сондай-ақ пойыздардың жылдамдығы артады.