Теміржол жөндеу жұмыстары қарқынды жүріп жатыр
«Қазақстан теміржолшысы» газетінің тілшісі
«Теміржол жөндеу» ЖШС филиалдары биылғы наурыз айынан бастап темір жол төсемін күрделі жөндеу бойынша қарқынды жұмыстар жүргізуде. Мәселен, маусым айының басында 78 шақырымнан астам жол жаңартылды. Бұл 244 км жылдық жоспардың 32,14% құрайды.
Тек мамыр айында 46,7 шақырым шамасында жол жөнделіп, жоспарланған 45,169 км көлемінен 1,517 км артық болған. Бұл көрсеткіштер жөндеу науқанының жоғары қарқыны мен тиімділігін растап отыр. Жұмыс ең өнімді жүргізілген учаскелерге келсек, ол Еркіншілік – Едіге учаскесі, бұл учаскеде Астана ЖМС 13,5 км орнына 14,5 км жолды жөндеген. Шар ӨУ-мен Ақсу-1 – Ақсу-2 телімі арасында 7,8 км орнына 8,5 шақырымға жөндеу жүргізсе, Бірлік ЖМС Жиделі – Бірлік учаскесі аралығында 11,996 шақырымды жөндеп, жоспарды толығымен орындаған.
Ал Ақтөбе жол машиналары станциялары Жарлы – Рзд 174 және Кенжалы – Рзд 142 телімдері аралығында 9,237 км және 2,335 км жөндеу жұмыстарын атқарып, жоспар меже үдесінен табылған. Мамандар атқарылып жатқан тыңғылықты шаруалардың ағымдағы серпінін ескере отырып, жылдық жоспар межеленген мерзімінен бұрын орындалатынына сенім білдіріп отыр.