Алматының теміржол вокзалдары ҚТЖ басқаруына берілді
«Қазақстан теміржолшысы» газетінің тілшісі
Алматы-1 және Алматы-2 теміржол вокзалдары «Қазақстан темір жолы» ұлттық компаниясының балансына қайтарылды.
Еске салсақ, 2019 жылы Алматы-1 және Алматы-2 теміржол вокзалдары қаланың коммуналдық меншігіне өткен еді. 2023 жылы стартегиялық обьект болып табылатын оңтүстік астанадағы теміржол вокзалдары қайтадан «ҚТЖ» ұлттық компаниясына қайтарылатыны мәлім болған. Биыл Көлік министрлігі вокзалдарды сенімгерлік басқаруға беру бойынша процедуралар жүріп жатқанын хабарлады. 2025 жылдың 16 шілдесінен бастап Алматы-1 және Алматы-2 теміржол вокзалдары сенімгерлік басқаруға қабылданды.
Ұлттық компания екі нысанды да жаңғыртуды жоспарлап отыр. Алматы-1 теміржол вокзалының ғимараты жөндеуден өтеді. Өз кезегінде, тарихи және мәдени ескерткіш саналатын Алматы-2 теміржол вокзалының ғимараты ҚР тарихи-мәдени мұра объектілерін қорғау және пайдалану саласындағы заңнамасының талаптарына сәйкес реставрациялануға жатады. Аталған жұмыстар жоспарға енгізілген және барлық нормативтік талапты сақтай отырып жүзеге асырылады.
Компанияның мәліметінше, бұл жобалар объектілердің пайдалану мерзімін ұзартуға, сондай-ақ олардың техникалық жай-күйі мен функционалдық мақсатын заманауи талаптарға сәйкестендіруге бағытталған. Бірақ жөндеу жұмыстарын жүргізудің мерзімі әлі нақтыланбаған. Жұмыстардың түпкілікті көлемі мен құрамы заңнамада белгіленген тәртіппен әзірленген ғылыми, жобалау-сметалық құжаттамаға орай мемлекеттік сараптама нәтижелері бойынша айқындалады.