Қызылжар жобасынан не күтеміз?
«Қазақстан теміржолшысы» газетінің тілшісі
Өткен айда 836 км құрайтын, құрылысы үш жылға созылған Достық – Мойынты темір жолының екінші желісі іске қосылды. Бүгінде Мойынты мен Қызылжар арасында теміржол құрылысы басталды.
Одан әрі Ақтау портына дейінгі жолдар түгел жаңғыртылады. Бұл – Қазақстанның көлік транзитіндегі рөлі мен салмағын айқындап отырған Транскаспий халықаралық көлік дәлізінің маңызды бөлігі болып табылады.
Сонымен Достық – Мойынты темір жолының жалғасы Қызылжар жобасынан не күтеміз? Бүгінде жоба құрылысы қарқынды жүріп жатыр. Мойынты – Қызылжар бағытында рельс табанына қажет 14 млн текше метр топырақтың 85 пайызы төселді. Мамандар жобаны мерзімінен бұрын аяқтауды көздеп отыр.
Мойынты – Қызылжар темір жолының жалпы ұзындығы 323 км. Оның 175 шақырымы Ұлытау облысы аумағынан өтеді. Қазірдің өзінде жер жұмыстарының 80 пайызы аяқталып, бір айдың көлемінде теміржол рельстерін төсей бастайды. Қазір қажетті шпал мен рельстер арнайы базада дайындалып жатыр. Теміржол құрылысы екі бағыттан қатар басталып, жоба аясында Қызылжар мен Мойынты станциялары кеңейтіліп, жаңғыртудан өтеді. Одан бөлек Қаражал қаласы мен Ақтау ауылында жаңадан станция салынады деп күтілуде.
Сарапшылардың пайымдауынша, жаңа жол жүк тасымалын ұлғайтуға мүмкіндік беріп, тауарларды жеткізу мерзімін бірнеше есе қысқартады. Қазір Қытай Еуропаға бірнеше жолмен тауар жеткізіп отыр. Олардың барлығы алыс және қауіп-қатерсіз емес. Ал құрлық жолы екі тарап үшін де тиімді болып отыр. Қытай тауары қазақ жерімен Каспийден өтіп, әрі қарай Кавказ елдері арқылы Қара теңізге шығып кете алады.
Мамандардың айтуынша, теміржол желісі транзиттік тасымалды жеңілдетіп қана қоймай, өңірлік экономикаға да тың серпін береді. Өндірісті өңірдің өнімін нарыққа шығаруға мүмкіндік кеңейеді. Қазақстанның транзиттік әлеуетін көбейтеді. Қазақстанның темір жолы арқылы енді жүк тасымалы бірнеше миллион тоннаға артады. Жұмыс қыста да тоқтамай жүре беретін болады. Жоба келесі жылдың аяғында тапсырылады деп жоспарланып отыр.