Сапалы инфрақұрылым – қауіпсіз қозғалыс кепілі

Республика көлемінде қарқынды жүргізіліп жатқан инфрақұрылымды жаңғырту жобасы шеңберінде Жамбыл жол дистанциясында да ауқымды жұмыстар атқарылуда.  

Өткен жылы Жамбыл жол дистанциясының жолшылары Табақбұлақ – Шабақты учаскесі аралығындағы 140-150 км шойын жолдың 11 шақырымына шаруашылық тәсілімен орташа жөндеу жұмыстарын жүргізді. Сонымен қатар Қорағаты – Түрксібтің тақ жолында рельстік тіректер тұтастай ауыстырылды. Тіректері ауысқан аумақтың жалпы көлемі 6,5 км құрайды. Ал Тараз және Түрксіб станцияларында 15 жаңа бағыттамалық бұрма кешені ауыстырылды. Бұдан бөлек 1,75 км  жолда рельстер жаңартылған.

– Магистральдық желілерді жаңғырту арқылы көлік дәлізінің тиімділігін де еселеп аттыруға болады. Біз бірінші кезекте, сапалы жол – тасымал көлемін арттыруға, қауіп-қатердің алдын алуға мүмкіндік беретінін ұмытпауымыз керек. Сондықтан жөндеу жұмыстары кезінде талап пен тәртіптің сақталуына баса көңіл бөлеміз. Былтыр станция жолдарын жаңғырту кезінде Тараздан Түрксіб станциясы учаскелері аумағында бағыттамалық бұрмаларды, рельстерді жаңартқанда осыны естен шығарған жоқпыз. Р43 маркалы рельстің 5,03 шақырымына, Р50-дің 1,75 шақырымына Р65 маркалы рельстер төселді. Қауіпсіздік пен сенімділікті арттыру мақсатында 14 теңестіргіш түйіспе кешені, 31 жаңа айқастырма, сондай-ақ 26 дана жөндеу жиынтығы ауыстырылды, – дейді Жамбыл жол дистанциясының бастығы Дәулетбек Несіпбекұлы.

Мамандар пойыздарды шұғыл тоқтату көбейген сайын магистральдық желінің бүліну ықтималдығы арта түсетінін айтады. Қозғалысқа кедергі келтіретін кез келген оқиғаның екіжақты шығынымен қатар, салдары да қиын соғуы мүмкін. Былтыр Жамбыл жол дистанциясы мал басу оқиғаларын азайту, қауіп-қатердің алдын алу мақсатында Ақыpтөбе – Ақшолақ аралығының жұп және тақ жолдарында жалпы ұзындығы 15,6 шақырымға қоршау орнатқан. Дәулетбек Несіпбекұлы жүргізілген жұмыстар теміржол желісінің техникалық жағдайын жақсартып, пойыздар қозғалысының қауіпсіз әрі үздіксіз болуына оң әсерін тигізеді деген сенімде.