Қызылорда және Ақтөбе теміржолшыларының бірлескен жұмысы нәтиже беруде

Қызылорда жол дистанциясының кеше Жалағаш – Қараиірім бекеттері аралығында, бүгін Тереңөзек – Қараөзек арасында Ақтөбе машиналандырылған жол дистанциясының техникалары сап түзеген күрделі жөндеу жұмыстары жүріп жатыр.    

Қараиірім – Жалағаш станциялары аралығында толаскез пилоттық режимде бір мезгілде екі телімде жүргізілуде. Сондықтан толаскез уақыттары да бірде түнгі уақытқа, бірде күндізгі мезгілге және әртүрлі уақыт айырмашылығымен беріліп жатыр екен. Әрине мұндағы басты ерекшелік – телімдерден кестемен өткізілетін пойыздар құрамының қозғалысы маңызды рөл алатыны белгілі.  

Қызылорда жол дистанциясының директоры орынбасары Батыр Мамедалиев пен телім бастығы Бақытбек Сәрсенов тәулік бойы жұмыс басында жүр. Күрделі жөндеу жұмыстарының сапалы болуын қозғалыс қауіпсіздігінің басты кепілі санайтын аймақ теміржолшылары толаскезге жоғары деңгейде дайындық жасап, уақытты тиімді пайдалануға тырысуда.    

– Ақтөбе машиналандырылған жол дистанциясының Қызылорда өндірістік теліміне қарасты арнайы жол машиналарының көмегімен жүргізіліп жатқан күрделі жөндеу жұмыстары жоспарланған кесте бойынша жүріп жатыр. Толаскездің тиімді өткізілуі үшін жол табанының, жоғары деңгейде тазалануы үшін жұмыс жасап, қатаң бақылау жасап жатырмыз, – дейді телім бастығы Бақытбек Сәрсенов.

– Жол машиналар кешені Дуомат-3342, ДГС-565, ПБР-871 жаңа жұмыс маусымына ақпан айында дайындық жасалып, наурыздан  бастап Қызылорда жол дистанциясының Жалағаш станциясының №9, №10 бекет жолдарында жұмысқа кірісті. Қазіргі таңда жұмыс жоспарының ретіне қарай Жалағаш – Тереңөзек станциялары арасында жолдың шағылтас қабатын тазалап, ұрып, көтеру, түзеу жұмыстары жүргізіліп жатыр. Қазіргі таңда Қараиірім – Жалағаш және Тереңөзек – Қараөзек станциялары аралығында жол төсемінің 4950 метрлік аумағына жол машиналарының көмегімен күрделі жөндеу жасалды. Берік Сарқожаев, Мұрат Қазанбаев, Нұрмахан Еңсепов секілді мамандардың кәсіби шеберлігін атап айту ләзім, – дейді Қызылорда өндірістік телімінің бастығы Ербол Рүстемов.

Жалпы наурыз айында жол машиналарына 10 шақырым жолды күрделі жөндеуден өткізіу бекітілсе, қазіргі таңда бір ауысымның күшімен 4950 метрлік аумақтың жолы технологиялық талапқа сай жөндеуден өткізіліпті. Мысалы бұған дейін берілген толаскездердің уақыт көлемі әр түрлі болуы, аймақтың климаттық ерекшелігі де жұмыстың өнімділігіне әсер еткендей. Дегенмен толаскездің уақытын тиімді пайдалануды алдын ала есептейтін теміржолшылар 16-17 наурызда берілген екі күнде ДМ-3342 және ДГС-565 машиналарымен 3200 метр, ПБР-871 машинасымен 5000 метрлік аумаққа күрделі жөндеумен қатар 3850 метрлік аумақты ағымдық күтімнен өткізді. Соның ішінде РМ-80 машинасымен 1100 метрлік жол көлеміне ағымдық күтім жасалды.