Семейде жол жөндеу жұмыстары қарқын алды

Семей магистральдық желі бөлімшесі бойынша жазғы жол күтіміне даярлық шаралары басталды. Биылғы жылғы жоспар жылдағыдан ауқымды болып отыр.

Аймақтағы транзиттік мүмкіндікті арттыру және пойыздардың жылдамдығын жоғарылату үшін осыған дейін жол инфрақұрылымын жаңғырту, соның ішінде ағаш жолдарды темірбетонмен ауыстыру жоспарланған. Өткен жылы бөлімше көлемінде бұл бағытта бірталай жұмыстар жүргізіліп, нәтижесін берді. Мәселен, «солтүстік тармақтағы» Белағаш – Дүйсекен, күнгейдегі Аягөз – 22 жол айрық және 22-ші жол айрық – Көшкентал телімдерінің 38,51 шақырымында жаңа материалдарды пайдалану арқылы күрделі жөндеу жұмыстары жүргізілген. Одан бөлек 5,6 км жол бойы күшейтілген орташа жөндеу, 22 км телімде орташа жөндеу жұмыстары жүргізілді. Оның сыртында бірқатар тораптық станциялардағы маневрлік жұмыстарды жақсарту мақсатында жөндеу жұмыстары жүргізілді.  

Бұл шаралар биыл да осы қарқынмен жалғаспақ. Мәселен, Ақсу-1 – Дегелең – Жаңа-Семей учаскесінде автоматты блок жүйесін салу бағдарламасын іске асыру аясында екі айырма пункт салынуда. Ал Жаңа-Семей жүк станциясын дамыту жоспары аясында қосымша қабылдау және жөнелту паркі салынып жатыр. Жуырда бөлімше басшысы Алмас Сейсемқанов телімдер бойындағы атқарылып жатқан жұмыстарды көріп, қадағалап шықты. Биылғы көктемгі комиссиялық бақылау барысында да осы аталған жұмыстар барысы бірінші кезекте назарға алынатын болады.  

Жалпы, бөлімше бойынша жол шаруашылығына қатысты нысандарды жаңғырту шаралары жыл сайын кең өріс алып келеді. Мәселен, теміржолшылардың жұмыс орындарын жақсарту үшін Семей магистральдық желі бөлімшесінің Семей учаскесіндегі 24 нысанда жылыту станциялары мен модульдік демалыс орындары стандартқа сай қайта жаңартылатын болады. Бұл бағыттағы жұмыстар Дегелең – Шаған – Жаңа-Семей телімдері бойынша басталып та кетті.  

НЖС-6 бөлімшесінің жол бөлімі мамандарының сөзіне сүйенсек, Семей магистральдық желі бөлімшесі 2027 жылдың соңына дейін жолдардың тозуын азайту, орта мерзімді жөндеу жұмыстарын күшейту, малға қоршаулар салу және теміржол өткелдерін жаңғырту бойынша кешенді шараларды жүзеге асырады. Мұның бәрі сайып келгенде шығыстағы пойыздар қозғалысы қауіпсіздігін жаңа деңгейге шығаруға, апаттардың алдын алуға және теміржолшылар мен тұрғындардың өмірі мен денсаулығын сақтауға бағытталған. Сонымен қатар бұл жұмыстардың барлығы аймақтағы 13 теміржол вокзалын қайта жаңғырту, Бақты – Аягөз телімін салу, қосымша кірме жолдарды салу сынды жоспарлы шаралармен қатар жүргізілмек.